ខេត្តឧត្តរមានជ័យ ៖ នៅថ្ងៃទី ១៧ ខែ តុលា ឆ្នាំ ២០២៦ កម្លាំងសមត្ថកិច្ចនគរបាល នៃស្នងការដ្ឋាននគរបាលខេត្តឧត្ដរមានជ័យ បានចុះប្រតិបត្តិការស្រាវជ្រាវ និងបង្ក្រាបទីតាំងល្បែងស៊ីសងខុសច្បាប់ (ជល់មាន់) មួយកន្លែង ស្ថិតនៅភូមិអូរកន្សែង សង្កាត់សំរោង ក្រុងសំរោង ខេត្តឧត្ដរមានជ័យ ។
ផ្អែកតាមរបាយការណ៍របស់សមត្ថកិច្ចបានឱ្យដឹងថា ប្រតិបត្តិការបង្ក្រាបនេះត្រូវបានធ្វើឡើងបន្ទាប់ពីទទួលបានតម្រុយ និងការរាយការណ៍ពីប្រជាពលរដ្ឋក្នុងមូលដ្ឋាន អំពីសកម្មភាពបើកលេងល្បែងស៊ីសងខុសច្បាប់ ដែលបង្កការរំខាន និងប៉ះពាល់ដល់សន្តិសុខ សណ្ដាប់ធ្នាប់សាធារណៈ។
ជាលទ្ធផល នៅក្នុងប្រតិបត្តិការនេះ កម្លាំងជំនាញបាន៖
ឃាត់ខ្លួនជនសង្ស័យជាមេក្លោង ចំនួន២នាក់
ដកហូតវត្ថុតាង ៖ មាន់ជល់ចំនួន ៩៣ ក្បាល រួមជាមួយសម្ភារបម្រើឱ្យសកម្មភាពជល់មាន់មួយចំនួនទៀត។
បច្ចុប្បន្ន ជនសង្ស័យទាំង២នាក់ រួមជាមួយវត្ថុតាង ត្រូវបានកម្លាំងសមត្ថកិច្ចកសាងសំណុំរឿង និងបញ្ជូនទៅកាន់សាលាដំបូងខេត្តឧត្តរមានជ័យ ដើម្បីចាត់ការ និងផ្តន្ទាទោសទៅតាមនីតិវិធីច្បាប់ជាធរមាន។
អាជ្ញាធរមានសមត្ថកិច្ចក៏បានអំពាវនាវដល់បងប្អូនប្រជាពលរដ្ឋទាំងអស់ ចូលរួមរាយការណ៍ជាបន្ទាន់ប្រសិនបើឃើញមានសកម្មភាពល្បែងស៊ីសងខុសច្បាប់គ្រប់ប្រភេទនៅក្នុងមូលដ្ឋាន ដើម្បីរួមគ្នារក្សាសន្តិសុខ សុវត្ថិភាព តាមគោលនយោបាយ «ភូមិ-ឃុំ-សង្កាត់ មានសុវត្ថិភាព»៕
