ខេត្តកំពង់ធំ ៖ លៀសដែលនេសាទដោយខុសច្បាប់ចំនួនជាង ៣ តោន ត្រូវបានកម្លាំងចម្រុះចាក់លែងចូលក្នុងបឹងទន្លេសាបវិញ ក្រោយពីបានចុះប្រតិបត្តិការបង្ក្រាបបទល្មើសនេសាទនៅតំបន់អភិរក្សបាឡត ស្ថិតក្នុងភូមិបាឡត ឃុំពាមបាង ស្រុកស្ទោង ខេត្តកំពង់ធំ។
ក្នុងប្រតិបត្តិការនេះ កម្លាំងចម្រុះបានឃាត់ខ្លួនប្រជាពលរដ្ឋចំនួន ២៧ នាក់ រឹបអូសកាណូតចំនួន ៦ គ្រឿង ព្រមទាំងឧបករណ៍នេសាទលៀសខុសច្បាប់មួយចំនួនទៀត។
ប្រតិបត្តិការនេះធ្វើឡើងនៅវេលាម៉ោង ៤ និង ៣០ នាទីទៀបភ្លឺ ថ្ងៃទី១ ខែវិច្ឆិកា ឆ្នាំ២០២៦ ដោយអនុវត្តតាមបទបញ្ជារបស់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ និងជាសមាជិកគណៈបញ្ជាការឯកភាពបង្ក្រាបបទល្មើសនេសាទខុសច្បាប់ក្នុងភូមិសាស្ត្របឹងទន្លេសាប។
តាមបទបញ្ជាខាងលើ ទីបញ្ជាការស្រាលប្រចាំការនៅឃុំពាមបាង ស្រុកស្ទោង បានសហការជាមួយមន្ត្រីជំនាញរដ្ឋបាលជលផល និងកម្លាំងពាក់ព័ន្ធ ចុះបង្ក្រាបសកម្មភាពនេសាទលៀសដោយប្រើប្រាស់មធ្យោបាយម៉ាស៊ីននៅក្នុងតំបន់អភិរក្ស ព្រមទាំងត្រួតពិនិត្យការដឹកជញ្ជូនលៀសខុសច្បាប់។
លោកអនុសេនីយ៍ឯក លុយ សុភាព នាយទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងជាប្រធានក្រុមទីបញ្ជាការស្រាល រួមជាមួយលោក ហួន ផល នាយសង្កាត់រដ្ឋបាលជលផលឃុំពាមបាង ស្រុកស្ទោង ដែលបានដឹកនាំកម្លាំងចម្រុះចុះអនុវត្តប្រតិបត្តិការដោយផ្ទាល់ បានបញ្ជាក់ថា ក្នុងសកម្មភាពបង្ក្រាបនេះ កម្លាំងបានឃាត់ និងសាកសួរប្រជាពលរដ្ឋចំនួន ២៧ នាក់ ដែលធ្វើដំណើរមកពីឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង និងបានឃាត់ទុកកាណូតចំនួន ៦ គ្រឿង ដែលពាក់ព័ន្ធនឹងសកម្មភាពនេសាទលៀសខុសច្បាប់នៅតំបន់អភិរក្សបាឡត។
ក្រោយពីការសាកសួរ កត់ត្រាកំណត់ហេតុ និងធ្វើកិច្ចសន្យាអប់រំណែនាំរួចមក កម្លាំងចម្រុះបានអនុញ្ញាតឱ្យប្រជាពលរដ្ឋទាំង ២៧ នាក់ វិលត្រឡប់ទៅកាន់លំនៅឋានវិញ ដោយបានអញ្ជើញក្រុមគ្រួសារឱ្យមកទទួលយកត្រឡប់ទៅមូលដ្ឋានក្នុងខេត្តកំពង់ឆ្នាំង។
ដោយឡែក កាណូតទាំង ៦ គ្រឿង និងឧបករណ៍ពាក់ព័ន្ធមួយចំនួន ត្រូវបានរក្សាទុកនៅសង្កាត់រដ្ឋបាលជលផលឃុំពាមបាង ដើម្បីចាត់ការបន្តតាមនីតិវិធីច្បាប់ស្តីពីជលផល។ ចំណែកលៀសដែលនេសាទបានដោយខុសច្បាប់ក្នុងបរិមាណជាង ៣ តោន ត្រូវបានកម្លាំងចម្រុះចាក់លែងចូលក្នុងបឹងទន្លេសាបវិញ ដើម្បីចូលរួមការពារ និងអភិរក្សធនធានមច្ឆជាតិ។
ជាមួយគ្នានេះ ឧត្តមសេនីយ៍ទោ សោម ស៊ុន បានថ្លែងការកោតសរសើរចំពោះកងកម្លាំងចម្រុះ ដែលបានអនុវត្តបទបញ្ជាយ៉ាងម៉ឺងម៉ាត់ និងបំពេញភារកិច្ចដោយស្មារតីទទួលខុសត្រូវខ្ពស់ ក្នុងការចូលរួមបង្ក្រាបបទល្មើសនេសាទខុសច្បាប់នៅក្នុងភូមិសាស្ត្របឹងទន្លេសាប។
ឧត្តមសេនីយ៍ទោ សោម ស៊ុន ក៏បានណែនាំដល់កងកម្លាំងចម្រុះទាំងអស់ឱ្យបន្តសហការគ្នា និងបង្កើនសកម្មភាពទប់ស្កាត់ និងបង្ក្រាបបទល្មើសនេសាទខុសច្បាប់ឱ្យបានជាប់ជាប្រចាំ ដោយមិនត្រូវដកថយឡើយ ដើម្បីអនុវត្តឱ្យមានប្រសិទ្ធភាពតាមបទបញ្ជារបស់ប្រមុខរាជរដ្ឋាភិបាល ក្រសួងស្ថាប័នពាក់ព័ន្ធ និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងលិខិតបទដ្ឋានគតិយុត្តនានា និងច្បាប់ស្តីពីជលផល។
លោកបានបញ្ជាក់ថា ការបង្ក្រាបបទល្មើសនេសាទ និងការការពារធនធានមច្ឆជាតិ គឺជាការងារសំខាន់ ដើម្បីរក្សាធនធានធម្មជាតិឱ្យបានគង់វង្ស សម្រាប់ប្រើប្រាស់ជាប្រយោជន៍រួមរបស់សង្គមជាតិ និងទុកជាមរតកសម្រាប់កូនចៅជំនាន់ក្រោយ៕
