ខេត្តកំពង់ធំ ៖ កម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ សហការជាមួយមន្ត្រីរដ្ឋបាលព្រៃឈើ បានចុះរុករក និងបង្ក្រាបបទល្មើសដឹកជញ្ជូនឈើខុសច្បាប់មួយករណី ដោយរឹបអូសបានរថយន្តកូរ៉េមួយគ្រឿង ដែលផ្ទុកឈើក្តារជំរៀក និងឈើសរសរជ្រុង សរុបប្រមាណជាង ៤ ម៉ែត្រគូប នៅតំបន់ភ្នំច្រាច់ ឃុំបឹងល្វា ស្រុកសន្ទុក ខេត្តកំពង់ធំ។
ប្រតិបត្តិការនេះបានធ្វើឡើងនៅវេលាម៉ោង ៧:៤៥ នាទីយប់ ថ្ងៃទី២៨ ខែតុលា ឆ្នាំ២០២៦ ដោយមានការសហការរវាងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងមន្ត្រីរដ្ឋបាលព្រៃឈើ ដើម្បីរុករក និងទប់ស្កាត់សកម្មភាពដឹកជញ្ជូនផលអនុផលព្រៃឈើដោយខុសច្បាប់នៅក្នុងតំបន់។
ក្នុងប្រតិបត្តិការនោះ កម្លាំងចម្រុះបានរកឃើញរថយន្តកូរ៉េមួយគ្រឿង ដែលដឹកឈើក្តារជំរៀក និងឈើសរសរជ្រុង មានបរិមាណសរុបប្រមាណជាង ៤ ម៉ែត្រគូប។ វត្ថុតាងទាំងនេះត្រូវបានកម្លាំងចម្រុះរឹបអូស និងដឹកយកទៅរក្សាទុកនៅស្នាក់ការរដ្ឋបាលព្រៃឈើកំពប់អំបិល ដើម្បីចាត់ចែង និងអនុវត្តនីតិវិធីតាមច្បាប់ជាធរមាន។
ការចុះបង្ក្រាបនេះបង្ហាញពីកិច្ចសហការរវាងកងកម្លាំង និងមន្ត្រីជំនាញ ក្នុងការចូលរួមទប់ស្កាត់បទល្មើសព្រៃឈើ និងការដឹកជញ្ជូនផលអនុផលព្រៃឈើដោយខុសច្បាប់។ ការអនុវត្តច្បាប់ និងការពង្រឹងការត្រួតពិនិត្យនៅតាមតំបន់ងាយរងគ្រោះ គឺជាកត្តាសំខាន់ក្នុងការចូលរួមការពារ និងអភិរក្សធនធានធម្មជាតិឱ្យបានគង់វង្ស។
គួរបញ្ជាក់ថា រថយន្ត និងឈើដែលត្រូវបានរឹបអូសក្នុងករណីនេះ ត្រូវបាននាំយកទៅរក្សាទុកនៅស្នាក់ការរដ្ឋបាលព្រៃឈើកំពប់អំបិល ដើម្បីរង់ចាំការចាត់ការបន្តតាមនីតិវិធីច្បាប់៕
