ខេត្តកំពង់ធំ ៖ នៅក្នុងពេលថ្មីៗនេះ លោក ឌៀប ពិសិដ្ឋ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ និងលោក ជិន ស៊ីថា នាយខណ្ឌរដ្ឋបាលជលផល បានដឹកនាំកម្លាំងចម្រុះចុះប្រតិបត្តិការបង្ក្រាបសកម្មភាពបទល្មើសនេសាទនៅលើផ្ទៃបឹងទន្លេសាប ត្រង់ចំណុចឃុំពាមបាង ស្រុកស្ទោង និងចំណុចឃុំផាត់សណ្ដាយ ស្រុកកំពង់ស្វាយ ដើម្បីទប់ស្កាត់ការលួចប្រកបមុខរបរនេសាទល្មើសនឹងច្បាប់ជលផល។
ជាលទ្ធផលជាក់ស្ដែង ក្នុងកិច្ចអន្តរាគមន៍នោះ កម្លាំងចម្រុះសម្រេចបានលទ្ធផលដូចខាងក្រោម៖
រុះរើ និងបំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន៖ របាំងសាច់អួនក្រឡាញឹកចំនួន ៨របាំង ប្រវែង ២,០០០ម៉ែត្រ, ទ្បុកចំនួន ១៦គ្រឿង, លប និងលូចំនួន ១៦មាត់ និងបង្គោលចំនួន ១,៥០០ដើម។
ចាក់លែងត្រីចម្រុះទម្ងន់ ៦០គីឡូក្រាម ចូលទៅក្នុងផ្ទៃបឹងទន្លេសាបវិញ។
ពាក់ព័ន្ធនឹងការចុះបង្ក្រាបបទល្មើសនេះ លោក ហុក ម៉ុន នាយរងសង្កាត់ជលផល និងលោក ផាន់ សុផុន ប្រធានស្នាក់ការបរិស្ថានប្រចាំភូមិបាឡត បានមានប្រសាសន៍ថា បទល្មើសនេសាទដែលបំពានច្បាប់ជលផល គឺត្រូវតែបង្ក្រាបជាដាច់ខាត គ្មានការលើកលែងឡើយ ព្រោះមន្ត្រីជំនាញតែងតែចុះអនុវត្តច្បាប់ជាប្រចាំ។
លោក ផាន់ សុផុន បានបន្តថា ក្នុងនាមជាមន្ត្រីបរិស្ថាន លោកតែងតែយកចិត្តទុកដាក់ចុះណែនាំដល់ប្រជានេសាទឱ្យយល់ដឹងពីច្បាប់ទម្លាប់ និងការហាមឃាត់ការដាក់ឧបករណ៍នេសាទលើសប្រវែងកំណត់។ លោកក៏បានសហការយ៉ាងជិតស្និទ្ធជាមួយមន្ត្រីជំនាញជលផល កងកម្លាំងទីបញ្ជាការស្រាល និងតំបន់ប្រតិបត្តិការសឹករង ដើម្បីទប់ស្កាត់បទល្មើសធនធានធម្មជាតិនៅលើផ្ទៃបឹងទន្លេសាបផងដែរ។
ជាចុងក្រោយ មន្ត្រីជំនាញបានអំពាវនាវដល់ប្រជានេសាទទាំងអស់ ឱ្យគោរព និងអនុវត្តតាមច្បាប់ជលផល ដើម្បីរួមគ្នាថែរក្សាធនធានវារីសាស្ត្រ និងពូជត្រីសម្រាប់ថ្ងៃអនាគត។
