រាជធានីភ្នំពេញ ៖ កាលពីព្រឹកថ្ងៃទី២៤ ខែតុលា ឆ្នាំ២០២៦ នៅទីស្តីការក្រសួងព័ត៌មាន សមាគមសារព័ត៌មានអេឡិចត្រូនិក( MSJ ) សហការជាមួយក្រសួងព័ត៌មាន បើក វគ្គសិក្ខាសាលា២ថ្ងៃ មានអ្នកចូលរួមប្រមាណជាង៧០០នាក់ ដែលរួមមានអ្នកសារព័ត៌មានមកពីទូទាំងប្រទេសនិង មន្រ្តីនគរបាល មន្ត្រីអាជ្ញាធរ នៅរាជធានីភ្នំពេញ និងបានស្នើសុំឱ្យលោក នេត្រ ភក្ត្រា រដ្ឋមន្ត្រីក្រសួងព័ត៌មាន បន្តគាំទ្រការបណ្តុះបណ្តាលអ្នកសារព័ត៌មាន និងជំរុញឱ្យមន្ត្រីជំនាញចូលរួមចែករំលែកបទពិសោធន៍ ចំណេះដឹង និងជំនាញពាក់ព័ន្ធនឹងវិស័យព័ត៌មាន ដើម្បីពង្រឹងការអនុវត្តក្រមសីលធម៌ និងការទទួលខុសត្រូវក្នុងការផ្សព្វផ្សាយព័ត៌មាន៕
មុនផ្សាយព័ត៌មានសន្តិសុខជាតិ និងព័ត៌មានយោធា អ្នកសារព័ត៌មានត្រូវគិតថាតើវាពិតឬទេ?តើវាបង្កហានិភ័យដល់ប្រត្តិបត្តិការយោធា ឬគ្រោះថ្នាក់ដល់ប្រជាពលរដ្ឋ ឬទេ?លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកទឹកចិត្តឲ្យអ្នកសារព័ត៌មានសួរសំណួរបែបនេះ នៅក្នុងអំឡុងបិទវគ្គបណ្តុះបណ្តាលអ្នកសារព័ត៌មាន នៅក្រសួងព័ត៌មាន កាលពីថ្ងៃទី២៥ ខែតុលា ឆ្នាំ២០២៦ ។លោករដ្ឋមន្ត្រី បានបន្ថែមថា ៖ “ព័ត៌មានកាន់តែក្តៅ អ្នកសារព័ត៌មានកាន់តែត្រជាក់ កុំក្តៅដូចព័ត៌មាន។
លោកបន្ថែមថា ៖ “ ចូរគិតគ្រប់ពាក្យដែលអ្នកនិយាយ ប៉ុន្តែកុំនិយាយគ្រប់ពាក្យដែលអ្នកបានគិត “ ។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានសង្កត់ធ្ងន់ថា៖ បណ្ណសារព័ត៌មានមិនមែនជាអភ័យឯកសិទ្ធិដែលអនុញ្ញាតឱ្យអ្នកសារព័ត៌មានធ្វើអ្វីតាមអំពើចិត្តនោះទេ។ អ្នកសារព័ត៌មានត្រូវប្រកាន់ខ្ជាប់នូវក្រមសីលធម៌វិជ្ជាជីវៈ គោរពការពិត និងមិនត្រូវទទួលប្រាក់ ឬផលប្រយោជន៍ជាថ្នូរនឹងការបិទបាំង កែប្រែ ឬបំភ្លៃព័ត៌មានឡើយ។
ការលើកឡើងនេះធ្វើឡើងក្នុងសិក្ខាសាលាស្តីពី «ការលើកកម្ពស់ការទទួលខុសត្រូវវិជ្ជាជីវៈសារព័ត៌មាន ការគោរពក្រមសីលធម៌ និងការអនុវត្តច្បាប់ក្នុងយុគសម័យឌីជីថល» ដែលរៀបចំឡើងនៅទីស្តីការក្រសួងព័ត៌មាន នាថ្ងៃទី២៤ ខែតុលា ឆ្នាំ២០២៦៕
