ខេត្តកំពង់ធំ ៖ នៅព្រឹកថ្ងៃទី ៧ ខែតុលា ឆ្នាំ២០២៦ គណៈកម្មការគ្រប់គ្រងការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានដឹកនាំកងកម្លាំងចម្រុះ អាជ្ញាធរដែនដី និងប្រជាសហគមន៍សរុប ១៣៦នាក់ (ស្រី ១៨នាក់) រួមគ្នាចុះដាំស្តារព្រៃឈើឡើងវិញ នៅសហគមន៍តំបន់ការពារធម្មជាតិជាំម្រេច ស្ថិតក្នុងដែនជម្រកសត្វព្រៃបឹងពែរ (ភូមិតាឡែក ឃុំសាលាវិស័យ ស្រុកប្រាសាទបល្ល័ង្ក)។
សកម្មភាពនេះដឹកនាំដោយ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ត្រៃយ៍នៃគណៈកម្មការខេត្ត អមដំណើរដោយ លោក អោង ប៊ុនធឿន ប្រធានមន្ទីរបរិស្ថានខេត្តកំពង់ធំ។
លោក អោង ប៊ុនធឿន បានឱ្យដឹងថា ព្រៃសហគមន៍តំបន់ការពារធម្មជាតិជាំម្រេច មានផ្ទៃដីសរុប ២ ៩០៨ហិកតា។ កន្លងមក មានជនខិលខូចបានលួចកាប់រានទន្ទ្រានយកដីធ្វើអាស្រ័យផល ប៉ុន្តែត្រូវស្ថាប័នជំនាញបរិស្ថាន រដ្ឋបាលស្រុក និងខេត្ត ចុះដកហូតយកមកធ្វើជាសម្បត្តិរដ្ឋវិញ។ ជាក់ស្តែង នៅថ្ងៃនេះ អាជ្ញាធរនិងសហគមន៍បានរួមគ្នាដាំកូនឈើប្រភេទគ្រញូងចំនួន ៥ ៧០០ដើម លើផ្ទៃដីដកហូតចំនួន ៩ហិកតា ដើម្បីស្តារគម្របព្រៃឈើឡើងវិញ។
ក្នុងឱកាសនោះ ឧត្តមសេនីយ៍ទោ សោម ស៊ុន បានគូសបញ្ជាក់ថា គិតចាប់តាំងពីចាប់ផ្តើមប្រតិបត្តិការកម្លាំងចម្រុះនាថ្ងៃទី ១ ខែឧសភា ឆ្នាំ២០២៤ រហូតមកដល់បច្ចុប្បន្ន (រយៈពេលជាង ២៨ខែ) គណៈកម្មការខេត្តបានបង្ក្រាប និងដកហូតដីព្រៃដែលត្រូវបានកាប់ទន្ទ្រានខុសច្បាប់បានចំនួន ៣៤៦ ទីតាំង ស្មើនឹង ជាង ៤ ៣០០ហិកតា ត្រឡប់មកជាសម្បត្តិរដ្ឋវិញ។ ផ្ទៃដីដកហូតទាំងនោះ ភាគច្រើនត្រូវបានដាំស្តារឡើងវិញ និងមួយចំនួនទៀតកំពុងដុះលូតលាស់ព្រៃធម្មជាតិឡើងវិញ។
លោកឧត្តមសេនីយ៍ទោ ក៏បានអំពាវនាវដល់ប្រជាពលរដ្ឋ និងប្រជាសហគមន៍ទាំងអស់ ត្រូវរួមគ្នាថែរក្សា និងការពារធនធានធម្មជាតិឱ្យបានគង់វង្ស និងសូមបោះបង់ចោលនូវសកម្មភាពលួចកាប់ឆ្ការព្រៃ យកដីធ្វើកម្មសិទ្ធិ ឬការកាប់ និងដឹកជញ្ជូនឈើខុសច្បាប់ ដែលជាអំពើល្មើសច្បាប់នាំឱ្យមានទោសទណ្ឌដល់ខ្លួន៕
