ខេត្តកំពង់ធំ ៖ កាលពីវេលាម៉ោង ៣:៣០ នាទីទាបភ្លឺ ឈានចូលថ្ងៃទី២០ ខែកញ្ញា ឆ្នាំ២០២៦ នៅតាមបណ្តោយផ្លូវជាតិលេខ៦ ចំណុចភូមិទួលសាលា ឃុំចុងដូង ស្រុកបារាយណ៍ ខេត្តកំពង់ធំ មនុស្សម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយ ដោយសាររថយន្ត TOYOTA TACOMA បើកបុកគោយន្តកន្ត្រៃដឹកឈើមូលពីក្រោយពេញទំហឹង ។
រថយន្តបង្កហេតុម៉ាក TOYOTA TACOMA ពណ៌ទឹកប្រាក់ ពាក់ស្លាកលេខ កំពង់ឆ្នាំង 2B-3848 បើកបរដោយបុរសមិនទាន់ស្គាល់អត្តសញ្ញាណ (រងរបួសធ្ងន់) និងមានអ្នករួមដំណើរម្នាក់ទៀត (បានស្លាប់)។ ជនរងគ្រោះទាំងពីរនាក់ជាភេទប្រុស មានទីលំនៅភូមិស្រយ៉ូវ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេបានឃើញគោយន្តកន្ត្រៃដឹកឈើមូលប៉ុនៗភ្លៅពេញទ្រុង បើកបរក្នុងទិសដៅពីជើងទៅត្បូង។ លុះមកដល់ចំណុចកើតហេតុ ស្រាប់តែមានរថយន្ត TACOMA បើកបរស្របទិសគ្នាក្នុងល្បឿនលឿន បានជ្រុលទៅបុកគោយន្តពីក្រោយពេញទំហឹងលាន់ដូចផ្គរលាន់ បណ្តាលឱ្យអ្នករួមដំណើរក្នុងរថយន្តស្លាប់បាត់បង់ជីវិតភ្លាមៗ រីឯអ្នកបើកបរប៉ះពាល់ធ្ងន់ធ្ងរ។ ដោយឡែក អ្នកបើកបរគោយន្តកន្ត្រៃមិនទាន់ដឹងពីស្ថានភាពរបួសស្រាលឬធ្ងន់ឡើយ ដោយបានចាកចេញពីកន្លែងកើតហេតុ សង្ស័យរត់គេចខ្លួន។
បច្ចុប្បន្ន វត្ថុតាងរថយន្ត និងគោយន្តកន្ត្រៃ ត្រូវបានសមត្ថកិច្ចវាស់វែង និងយកទៅរក្សាទុកនៅអធិការដ្ឋាននគរបាលស្រុកបារាយណ៍ ដើម្បីរង់ចាំចាត់ការតាមនីតិវិធីច្បាប់៕
