រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅថ្ងៃទី១៩ ខែកក្កដា ឆ្នាំ២០២៦ នេះ បានផ្ញើសារអបអរសាទរយ៉ាងកក់ក្តៅចំពោះក្រុមបាល់ទះបុរសជម្រើសជាតិកម្ពុជា ដែលដណ្តើមបានជោគជ័យយ៉ាងត្រចេះត្រចង់ ក្នុងព្រឹត្តិការណ៍ពានរង្វាន់ SEA V-CUP លើកទី៦ នៅប្រទេសហ្វីលីពីន។
ការអបអរសាទរនេះ ធ្វើឡើងបន្ទាប់ពីក្រុមបាល់ទះបុរសជម្រើសជាតិកម្ពុជា បានបង្ហាញទម្រង់លេងយ៉ាងអស្ចារ្យដោយបានយកឈ្នះក្រុមខ្លាំងថៃ ក្នុងលទ្ធផល ៣-១ កាលពីម្សិលមិញ និងបន្តវាយទម្លាក់ក្រុមឥណ្ឌូណេស៊ី ក្នុងលទ្ធផល ៣-២ នៅយប់ថ្ងៃទី១៩ កក្កដានេះ។
សម្ដេចតេជោ បានគូសបញ្ជាក់ថា ជ័យជម្នះនេះគឺជាមោទនភាពដ៏ធំធេងសម្រាប់ប្រជាជនកម្ពុជាទាំងមូល ព្រមទាំងបានកោតសរសើរចំពោះការខិតខំប្រឹងប្រែង ស្មារតីសាមគ្គី និងការលះបង់របស់កីឡាករគ្រប់រូប ដែលបាននាំយកកិត្តិយសជូនជាតិមាតុភូមិលើឆាកអន្តរជាតិយ៉ាងពិតប្រាកដ៕រូបភាពផេកផ្លូវការសម្តេចតេជោ
