ខេត្តកំពង់ធំ ៖ កម្លាំងជំនាញចម្រុះក្នុងខេត្តកំពង់ធំ នៅតែបន្តយុទ្ធនាការចុះទប់ស្កាត់ និងបង្ក្រាបបទល្មើសនេសាទនៅលើផ្ទៃបឹងទន្លេសាបយ៉ាងសកម្មដូចភ្លៀងរលឺមក្នុងរដូវបិទនេសាទ (រដូវត្រីពងកូន)។
យុទ្ធនាការបង្ក្រាបនៅតែបន្តធ្វើឡើង ដោយគិតត្រឹមថ្ងៃចន្ទ ទី១៣ ខែកក្កដា ឆ្នាំ២០២៦ នេះ កម្លាំងចម្រុះបានចេញប្រតិបត្តិការទប់ស្កាត់ចំនួន ២គោលដៅធំៗ រួមមាន៖
គោលដៅទី១៖ នៅចំណុចមុខបាទាល់ ឃុំពាមបាង ស្រុកស្ទោង ដឹកនាំដោយលោក ហួន ផល នាយសង្កាត់រដ្ឋបាលជលផលពាមបាង សហការជាមួយកម្លាំងកងអាវុធហត្ថខេត្ត (ដឹកនាំដោយលោកវរសេនីយ៍ឯក គង់ សុភាព មេបញ្ជាការរង និងជាប្រធានក្រុមការងារទីបញ្ជាការស្រាលប្រចាំការឃុំពាមបាង) និងកម្លាំងតំបន់ប្រតិបត្តិការសឹករងកំពង់ធំ (យោធភូមិភាគទី៤)។
គោលដៅទី២៖ នៅចំណុចពូនភ្នំ ឃុំផាត់សណ្តាយ ស្រុកកំពង់ស្វាយ ដឹកនាំដោយលោក ប៉ែន សាវ៉េង នាយរងផ្នែករដ្ឋបាលជលផលផាត់សណ្តាយ ដោយបានដឹកនាំកម្លាំងសង្កាត់រដ្ឋបាលជលផលកំពង់ស្វាយក្រោម សហការជាមួយកម្លាំងតំបន់សឹករងកំពង់ធំ។
ជាលទ្ធផលក្នុងប្រតិបត្តិការខាងលើនេះ កម្លាំងជំនាញចម្រុះសម្រេចបាន ១ករណីធំ ដោយបានធ្វើការរុះរើ និងកាប់បំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន៖
របាំងសាច់ស្បៃមុង៖ ចំនួន ១២របាំង ប្រវែង ៩០០ម៉ែត្រ
លប/លូ៖ ចំនួន ២២មាត់
ឡុក៖ ចំនួន ១៨គ្រឿង
បង្គោលឈើ៖ ចំនួន ៦៥០ដើម
ត្រីចម្រុះ៖ ទម្ងន់ ១៥គីឡូក្រាម ត្រូវបានចាក់ប្រលែងចូលទៅក្នុងទន្លេវិញ៕
