ខេត្តកំពង់ឆ្នាំង ៖ កាលពីថ្ងៃទី៣០ ខែឧសភា ឆ្នាំ២០២៦ នៅតាមបណ្តោយផ្លូវជាតិលេខ៥ ក្នុងភូមិសាស្ត្រស្រុករលាប្អៀរ ខេត្តកំពង់ឆ្នាំង កម្លាំងនគរបាលចរាចរណ៍ផ្លូវគោកខេត្តកំពង់ឆ្នាំង សហការជាមួយកម្លាំងនគរបាលចរាចរណ៍ស្រុករលាប្អៀរ និងមន្ទីរសាធារណការ និងដឹកជញ្ជូនខេត្ត បានចុះអនុវត្តច្បាប់ និងឃាត់រថយន្តធុនធំចំនួន ៤គ្រឿង ដែលតទ្រុងខុសលក្ខណៈបច្ចេកទេស ក្នុងនោះមាន ១គ្រឿងបានបង្កគ្រោះថ្នាក់ចរាចរណ៍ដល់អ្នកធ្វើដំណើរ។
សមត្ថកិច្ចបានឱ្យដឹងថា ក្នុងចំណោមរថយន្តទាំង ៤គ្រឿងនោះ មាន ១គ្រឿងបានបង្កគ្រោះថ្នាក់ចរាចរណ៍ ដោយសារការចតនៅលើដងផ្លូវ ធ្វើឱ្យអ្នកជិះម៉ូតូបើកបុកពីក្រោយបណ្តាលឱ្យរងរបួសធ្ងន់ធ្ងរ។ បច្ចុប្បន្ន សមត្ថកិច្ចកំពុងដោះស្រាយករណីគ្រោះថ្នាក់ចរាចរណ៍នេះជាមុនសិន មុននឹងបន្តនីតិវិធីកាត់ទ្រុងបន្ថែម។
ពាក់ព័ន្ធនឹងវិធានការចំពោះរថយន្តតទ្រុងទាំងនេះ សមត្ថកិច្ចបានបញ្ជាក់ថា មិនមែនយកមកកាត់ភ្លាមៗនោះទេ ពោលគឺមានគណៈកម្មការដឹកនាំដោយអាជ្ញាធរខេត្ត និងមន្ទីរសាធារណការ ដើម្បីសុំគោលការណ៍ទៅឯកឧត្តមព្រះរាជអាជ្ញា ក្នុងការហៅម្ចាស់រថយន្ត ឬតំណាងក្រុមហ៊ុនមកវាស់វែង និងពិនិត្យជាក់ស្ដែងថាតើលើសកម្រិតណា និងត្រូវកាត់ចោលកម្រិតណា។
កន្លងមក សមត្ថកិច្ចខេត្តកំពង់ឆ្នាំងបានអនុវត្តច្បាប់យ៉ាងតឹងរ៉ឹង ដោយបានឃាត់ និងកាត់ទ្រុងរថយន្តខុសលក្ខណៈបច្ចេកទេសជាបន្តបន្ទាប់ជាច្រើនគ្រឿងមកហើយ។ ក្រោយពេលកាត់ទ្រុងរួចរាល់ និងធ្វើកិច្ចសន្យាត្រឹមត្រូវ ទើបប្រគល់ជូនម្ចាស់យានយន្តយកទៅប្រើប្រាស់វិញ។
លោក ឆាយ លាភា ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង បានអំពាវនាវដល់ម្ចាស់យានយន្តទាំងអស់ ត្រូវគោរពច្បាប់ឱ្យបានខ្ជាប់ខ្ជួន ស្របតាមលក្ខណៈបច្ចេកទេស និងការត្រួតពិនិត្យលក្ខណៈបច្ចេកទេស (ឆៀក) ឱ្យបានត្រឹមត្រូវ និងសូមកុំកែច្នៃរថយន្តខុសច្បាប់តទៅទៀត។
គួររំលឹកផងដែរថា ផ្អែកលើការណែនាំរបស់ក្រសួងសាធារណការ និងដឹកជញ្ជូន និងច្បាប់ស្ដីពីចរាចរណ៍ផ្លូវគោក យានយន្តទាំងឡាយណាដែលរកឃើញថាមានការកែច្នៃ តទ្រុង ឬដំឡើងប្រវែង-កម្ពស់ខុសពីសៀវភៅឆៀក នឹងត្រូវឃាត់ទុកដើម្បីបង្គាប់ឱ្យកាត់ទ្រុងតម្រូវតាមស្តង់ដារដើមវិញ។ ក្រៅពីការកាត់ទ្រុង ម្ចាស់យានយន្តក៏ត្រូវរងការផាកពិន័យជាប្រាក់ទៅតាមទំហំនៃបទល្មើសផងដែរ ដើម្បីបង្ការគ្រោះថ្នាក់ចរាចរណ៍ និងទប់ស្កាត់ការខូចខាតហេដ្ឋារចនាសម្ព័ន្ធផ្លូវថ្នល់។
ទោះជាយ៉ាងណាក៏ដោយ មហាជននៅតែលើកឡើងជាចម្ងល់ថា វិធានការបង្ក្រាបហាក់ដូចជា «ភ្លៀងរលឹម» គឺមានជាបន្តបន្ទាប់ ប៉ុន្តែអ្នកប្រព្រឹត្តនៅតែបន្តល្មើសច្បាប់ដដែល ដែលករណីនេះទាមទារឱ្យមានការរឹតបន្តឹងច្បាប់ឱ្យកាន់តែមានប្រសិទ្ធភាពបន្ថែមទៀត៕
