អន្តរជាតិ ៖ លោកប្រធានាធិបតី ដូណាល់ ត្រាំ បាននិយាយថា សហរដ្ឋអាមេរិកត្រូវការពេលមួយសប្តាហ៍កន្លះ ដើម្បីដកយកសារធាតុអ៊ុយរ៉ាញ៉ូមចេញពីរោងចក្រនុយក្លេអ៊ែរអ៊ីរ៉ង់ដែលត្រូវបានវាយប្រហារ កាលពីខែមិថុនា ឆ្នាំ២០២៥ កន្លងទៅ។
លោក បានលើកឡើងថា ផែនការនេះ នឹងតម្រូវឱ្យភ្នាក់ងារអាមេរិកស្នាក់នៅលើទឹកដីនៃសាធារណរដ្ឋអ៊ីស្លាមរយៈពេលមួយសប្តាហ៍កន្លះ។
លោក បានឱ្យដឹង នៅក្នុងបទសម្ភាសន៍មួយថា យើងកំពុងគិតអំពីផែនការនេះ ហើយវានឹងចំណាយពេលមួយសប្តាហ៍កន្លះ។ ប៉ុន្តែនោះជាពេលវេលាយូរណាស់ក្នុងការស្ថិតលើទឹកដីសត្រូវ។
យោងតាមលោកប្រធានាធិបតី បានបញ្ជាក់ថា ក្នុងអំឡុងពេលប្រតិបត្តិការដើម្បីដកយកអ៊ុយរ៉ាញ៉ូមដែលចម្រាញ់រួច គឺនឹងត្រូវខួងយកថ្មក្រានីត។ លោក បន្តថា ថ្មក្រានីតគឺជាដំណាក់កាលដែលពិបាកបំផុត។
គួរបញ្ជាក់ថា កាលពីចុងឆ្នាំមុន អាមេរិក បានវាយប្រហារទីតាំងចម្រាញ់អ៊ុយរ៉ាញ៉ូមអ៊ីរ៉ង់ បង្កការខូចខាតយ៉ាងដំណំដែលជះឥទ្ធិពលដល់ដំណើរការកម្មវិធីនុយក្លេអ៊ែរមួយភាគធំ ខណៈមកដល់ពេលនេះសារធាតុទាំងនោះនៅមិនទាន់ត្រូវបាននាំយកចេញនៅឡើយ៕
