សម្ដេចមហាបវរធិបតី ហ៊ុន ម៉ាណែត បានមានប្រសាសន៍ថា ការរៀបចំទីស្នាក់ការសមាគមអតីតយុទ្ធជននិងនិវត្តជនកម្ពុជានៅគ្រប់រាជធានីខេត្តគឺបាន បង្ហាញអំពីការតាំងចិត្តរយៈពេលវែងលើការងារអតីតយុទ្ធជន និងនិវត្តជនកម្ពុជា។
សម្ដេចមហាបវរធិបតី ហ៊ុន ម៉ាណែត អនុប្រធានទី១សមាគមអតីតយុទ្ធជននិងនិវត្តជនកម្ពុជានៅក្នុងឱកាសខួបលើកទី១៩ទិវាអតីតយុទ្ធជននិងនិវត្តជនកម្ពុជាប៉ុន្តែបានរៀបចំនៅថ្ងៃទី១៥ ឧសភានេះ នៅសាលសន្និបាតកោះពេជ្របានស្នើឲ្យ ក្រសួងសង្គមកិច្ចអតីតយុទ្ធជននិងយុវនីតិសម្បទាត្រូវបន្តជំរុញបង្កើតគណៈកម្មការអភិវឌ្ឍន៍សហគមន៍អតីតយុទ្ធជននិងនិវត្តជនឃុំសង្កាត់រាជធានីខេត្តដោយចុះប្រមូលទិន្នន័យបង្ហាញអំពីបញ្ហាប្រឈមនិងតម្រូវការរបស់អតីតយុទ្ធជនអតីតមន្ត្រីរាជការស៊ីវិលនិងគ្រួសារនិងរៀបចំកម្មវិធីអភិវឌ្ឍន៍សហគមន៍អតីតយុទ្ធជននិងនិវត្តជនឃុំសង្កាត់រាជធានីខេត្តឱ្យមានដំណើរការល្អដើម្បីបង្កើនប្រសិទ្ធភាពក្នុងការផ្ដល់សេវាគាំពារសុខមាលភាពអតីតយុទ្ធជននិងនិវត្តជនឲ្យកាន់តែប្រសើរឡើងស្របតាមស្នាដៃគុណបំណាច់ដ៏ធំធេងរបស់អតីតយុវជននិងអតីតមន្ត្រីរាជការស៊ីវិល។
យោងតាមឯកឧត្តម គន់ គីម អគ្គលេខាធិការសមាគមអតីតយុទ្ធជននិងនិវត្តជនកម្ពុជាបានឲ្យដឹងថា នៅដំណាច់ឆ្នាំ២០២៦នេះនឹងមានទីស្នាក់ការសមាគមអតីតយុទ្ធជននិងនិវត្តជនកម្ពុជានៅគ្រប់រាជធានីខេត្ត។
ឯកឧត្តម គន់ គីម បានបញ្ជាក់ថា សមាគមចាប់ផ្តើមរៀបចំប្រមូលទិន្នន័យដើម្បីគ្រប់គ្រងនិវត្តជននៅតាមក្រសួងស្ថាបនរដ្ឋដោយចាប់ផ្តើមជួយផ្តល់ប័ណ្ណបសស ផ្តល់ផ្ទះដល់អតីតយុទ្ធជនក្រីក្រ ផ្តល់ទឹក ភ្លើងហើយកំពុងតែឈានទៅដោះស្រាយហេដ្ឋារចនាសម្ព័ន្ធនៅភូមិដែលបានសង់ផ្ទះជូន និងផ្សារជាបន្តទៀត។
ឯកឧត្តម គន់ គីម បានបញ្ជាក់ទៀតថា សមាគមមានគម្រោងសង់ផ្ទះតម្លៃ៥០០០ដុល្លារក្នុង១ខ្នងដោយសង់ចំនួនជាង៣០០០ខ្នងជូនអតីតយុទ្ធជនដែលតាមផែនការអាចនឹងដោះស្រាយរួចរាល់នៅឆ្នាំ២០២៨។ ក៏ប៉ុន្តែនៅក្នុងឱកាសកិច្ចប្រជុំនេះ សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន បានជួយ១០០ខ្នង សម្ដេចមហាបវរធិបតី ហ៊ុន ម៉ាណែត បានជួយ៥០ខ្នង ដោយឡែកឯកឧត្តមអភិបាលរាជធានីខេត្ត ឯកឧត្តរដ្ឋមន្ត្រី និងក្រុមហ៊ុនឯកជនបានប្រកាសជួយសរុបបានចំនួន៣៤៨ខ្នងទៀត ដែលសរុបទាំងមូលបានចំនួន៤៩៨ខ្នង។
យោងតាមឯកឧត្តម ជា សុមេធី រដ្ឋមន្ត្រីក្រសួងសង្គមកិច្ចអតីតយុទ្ធជននិងយុវនីតិសម្បទាបានឲ្យដឹងថា បច្ចុប្បន្ន ចំនួនអតីតយុទ្ធជន និងនិវត្តជន មានចំនួនសរុប១៧៧,២៨១នាក់ ដែលក្នុងនោះមាន អតីតយុទ្ធជនចំនួន ១១៩,៣២៦នាក់ និងអតីតមន្ត្រីរាជការស៊ីវិល មានចំនួន៥៧,៩៥៥នាក់៕ ប្រភពព័ត៌មាន
