កម្លាំងចម្រុះ បង្ក្រាបបទល្មើសឆក់ត្រី ក្នុងស្រុកកំពង់លែង ឃាត់ខ្លួនជនសង្ស័យម្នាក់ និងរឹបអូសវត្ថុតាងជាច្រើន

 

​ខេត្តកំពង់ឆ្នាំង ៖ អនុវត្តតាមបទបញ្ជាយ៉ាងម៉ឺងម៉ាត់ នាថ្ងៃទី០៥ ខែឧសភា ឆ្នាំ២០២៦ វេលាម៉ោង ១១:៣០នាទីព្រឹក កម្លាំងតំបន់ប្រតិបត្តិការសឹករងកំពង់ឆ្នាំង សហការជាមួយកងពលតូចលេខ៧០ និងខណ្ឌរដ្ឋបាលជលផលខេត្ត បានចុះបង្ក្រាបករណីនេសាទខុសច្បាប់ (ឆក់ត្រី) នៅចំណុចព្រែកជើងគ្រោះ ស្ថិតក្នុងភូមិជើងគ្រោះ ឃុំស្វាយរំពារ ស្រុកកំពង់លែង។
​សកម្មភាពបង្ក្រាប និងការប៉ះទង្គិច
​ក្នុងប្រតិបត្តិការនេះ ដឹកនាំដោយលោកវរសេនីយ៍ទោ ម៉ៅ វេ មេបញ្ជាការរងតំបន់ប្រតិបត្តិការសឹករងកំពង់ឆ្នាំង និងលោកឧត្តមសេនីយ៍ត្រី មួង ណួរ៉ា មេបញ្ជាការអង្គភាព ង៧០ ប្រចាំភូមិសាស្ត្រខេត្តកំពង់ឆ្នាំង។ នៅពេលកម្លាំងចម្រុះកំពុងល្បាត ក៏ប្រទះឃើញក្រុមជនល្មើសកំពុងធ្វើសកម្មភាព។
​ក្នុងអំឡុងពេលដេញចាប់ ក្រុមជនល្មើសបានបើកទូកបំបុកទូករបស់សមត្ថកិច្ច បណ្តាលឱ្យលិចទូកចំនួន ២ គ្រឿង និងធ្លាក់សម្ភារៈប្រើប្រាស់ មាន(វិទ្យុទាក់ទង និងទូរស័ព្ទ) ចូលទៅក្នុងទឹកផងដែរ។
ជាលទ្ធផល សមត្ថកិច្ចឃាត់ខ្លួនបានជនសង្ស័យម្នាក់ ខណៈបក្ខពួកមួយចំនួនទៀតបានរត់គេចខ្លួនបាត់ស្រមោល។
​វត្ថុតាងដែលរឹបអូសបានរួមមាន៖
​អាំងវែរទ័រឆក់ត្រី៖ ០១ គ្រឿង
​អាគុយ ៧០ អំពែ (ម៉ាក Long)៖ ០១ គ្រឿង
​កន្ត្រងដងត្រី៖ ០៣
​ខ្សែភ្លើង និងខ្សែកាប៖ ប្រវែង ០៨ ម៉ែត្រ
​ទូក និងម៉ាស៊ីន៖ ០១ គ្រឿង
​លោកវរសេនីយ៍ទោ ម៉ៅ វេ បានបញ្ជាក់ថា ជនសង្ស័យរួមនឹងវត្ថុតាង (ឧបករណ៍ឆក់) ត្រូវបានប្រគល់ជូនខណ្ឌរដ្ឋបាលជលផលកំពង់ឆ្នាំង ដើម្បីចាត់ការតាមនីតិវិធីច្បាប់។ ដោយឡែក ចំពោះទូកនិងម៉ាស៊ីន ត្រូវបានរក្សាទុកជាបណ្តោះអាសន្ននៅអង្គភាព ង៧០៕