.jpg)
ខេត្តកំពង់ឆ្នាំង ៖ ក្រុមជនល្មើសឆ្លៀតឱកាសដែលកំពុងតែបំផ្លាញធនធានធម្មជាតិយ៉ាងព្រហើន ត្រូវបាបង្ក្រាបទាំងកណ្តាលអាធ្រាត បន្ទាប់ពីកម្លាំងនគរបាលនៃអធិការដ្ឋានស្រុកជលគិរី បានបើកប្រតិបត្តិការបង្ក្រាបទាន់ពេលវេលា ឃាត់ខ្លួនអ្នកបើកបរម្នាក់ និងដកហូតត្រាក់ទ័រចំនួន ៣ គ្រឿង ខណៈកំពុងលួចធ្វើសកម្មភាពឈូសឆាយដីព្រៃលិចទឹករបស់រដ្ឋ។
យោងតាមប្រភពព័ត៌មានពីប្រជាពលរដ្ឋដែលដើរឆ្លុះកណ្តុរនាពេលយប់បានឱ្យដឹងថា នៅវេលាម៉ោង ១១:០០ យប់រំលងអាធ្រាត ថ្ងៃទី ២១ ខែឧសភា ឆ្នាំ ២០២៦ ពួកគេបានប្រទះឃើញត្រាក់ទ័រចំនួន ៣ គ្រឿង កំពុងតែលួចធ្វើសកម្មភាពឈូសឆាយយ៉ាងអនាធិបតេយ្យលើដីព្រៃលិចទឹក ដែលជាតំបន់ហាមឃាត់របស់រដ្ឋ នៅត្រង់ចំណុចទួលកប់ចែស ស្ថិតក្នុងភូមិពាមឆ្កោក ឃុំពាមឆ្កោក ស្រុកជលគិរី ខេត្តកំពង់ឆ្នាំង។ ភ្លាមៗនោះ ប្រជាពលរដ្ឋល្អបានរាយការណ៍ជាបន្ទាន់ទៅកាន់កម្លាំងសមត្ថកិច្ច។
បន្ទាប់ពីទទួលបានសញ្ញាភ្លើងខៀវពីប្រជាពលរដ្ឋ កម្លាំងអធិការដ្ឋានស្រុកជលគិរី បានចុះអន្តរាគមន៍ដល់ទីតាំងកើតហេតុទាំងកណ្តាលយប់ ដោយបានឃាត់ទុកត្រាក់ទ័រទាំង ៣ គ្រឿង និងឃាត់ខ្លួនអ្នកបើកបរម្នាក់ នាំយកមកកសាងសំណុំរឿងនៅអធិការដ្ឋានស្រុក ដើម្បីចាត់ការបន្តតាមនីតិវិធីច្បាប់យ៉ាងតឹងរ៉ឹងបំផុត ដោយមិនមានការលើកលែងឡើយ។
គួររំលឹកផងដែរថា ទីតាំងដីព្រៃលិចទឹកនៅចំណុចកប់ចែសនេះ កាលពីប៉ុន្មានខែមុន ក៏ធ្លាប់ត្រូវបានក្រុមជនខិលខូច លួចបញ្ជាត្រាក់ទ័រមកឈូសឆាយអស់ជាច្រើនហិកតារួចមកហើយ ដែលបង្កឱ្យមានការខូចខាតយ៉ាងធ្ងន់ធ្ងរដល់ជម្រកមច្ឆជាតិ។
មហាជនបានសម្តែងការគាំទ្រយ៉ាងខ្លាំងចំពោះចំណាត់ការក្តៅគគុករបស់សមត្ថកិច្ច និងបានលើកឡើងថា ក្រុមជនឆ្លៀតឱកាស និងមេខ្លោងនៅពីក្រោយខ្នងដែលហ៊ានបំពានច្បាប់ បំផ្លាញសម្បត្តិរួមរបស់ជាតិបែបនេះ ត្រូវតែទទួលទណ្ឌកម្មព្រហ្មទណ្ឌឱ្យបានធ្ងន់ធ្ងរបំផុត ដើម្បីជាការព្រមាន។ ដូចពាក្យចាស់ពោលថា «កុកភ្លេចជុង តែជុងមិនភ្លេចកុកឡើយ» ឱ្យតែហ៊ានប្រព្រឹត្តបទល្មើស គឺមុខជាមិនរួចខ្លួនពីសំណាញ់ច្បាប់នោះទេ៕
.jpg)
.jpg)