ខេត្តបន្ទាយមានជ័យ : ទោះបីជារងគ្រោះដោយសង្គ្រាមព្រំដែនដែលបង្កដោយថៃឈ្លានពាន ក៏ឆ្នាំសិក្សា២០២៥-២៦ នេះ បែរជាខេត្តបន្ទាយមានជ័យបានរៀបចំការប្រឡងសិស្សពូកែថ្នាក់ខេត្តផ្នែកមុខវិជ្ជាអក្សរសិល្ប៍ខ្មែរ គណិតវិទ្យា និងរូបវិទ្យាល្អប្រសើរនិងពិសេសជាងមុន។
សម័យប្រឡងនាថ្ងៃទី១៧ ខែមីនា ឆ្នាំ២០២៦ ប្រព្រឹត្តទៅនៅមណ្ឌលសំណេរនៅវិទ្យាល័យ ហ៊ុនសែន ខ្លាកូន ជាប់មន្ទីរអប់រំ ខេត្តនាវិថី៧មករា ភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ។
ការកាត់ស្រោមវិញ្ញាសារនៃការប្រឡងសិស្សពូកែថ្នាក់ខេត្ត អញ្ជើញក្រោមអធិបតីភាព លោក ឃូ ពៅ អភិបាលរងនៃគណៈអភិបាលខេត្ត តំណាងដ៏ខ្ពង់ខ្ពស់លោក អ៊ុំ រាត្រី អភិបាលនៃគណៈអភិបាលរងខេត្តបន្ទាយមានជ័យ និងមានការចូលរួមពីលោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តនិងមន្ត្រីជំនាញ អ្នកពាក់ព័ន្ធជាគណ:មេប្រយោគ។
នាឱកាសនោះ លោក ឃូ ពៅ អភិបាលរងខេត្តបន្ទាយមានជ័យក្នុងនាមលោក អ៊ុំ រាត្រី អភិបាលខេត្តបានមានប្រសាសន៍ជម្រុញលើកទឹកចិត្តនិងថ្លែងអំណរគុណដល់មន្ទីរអប់រំ យុវជននិងកីឡាខេត្ត ក៏ដូចជាការិយាល័យប្រឡង ការិយាល័យអប់រំស្រុកក្រុង គណៈគ្រប់គ្រង លោកគ្រូអ្នកគ្រូ ដៃគូអភិវឌ្ឍន៍ អាជ្ញាធរនិងអាណាព្យាបាលសិស្សនិងសាម៉ីខ្លួនបេក្ខជនសិស្សទាំង៣កម្រឹតនៃ២ភូមិសិក្សាដែលបានគាំទ្រដំណើរការប្រឡងជ្រើសរើសសិស្សពូកែនេះ ស្របតាមការណែនាំរបស់ក្រសួងអប់រំ យុវជននិងកីឡា។
លោក ឃូ ពៅ បានជូនពរឲ្យបេក្ខជន បេក្ខនារីមកពីគ្រឹះស្ថានបឋមសិក្សានិងមធ្យមសិក្សាសាធារណ: និងឯកជនទាំងឡាយមានសុខភាពល្អ ហើយទទួលជោគជ័យជាជ័យលាភីលើការប្រឡងសិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យានេះ ។
លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យមានប្រសាសន៍ថា: ការប្រឡងនេះមានបេក្ខជនសរុបចំនួន ៧០៧នាក់/ស្រី២០៨នាក់ :
១-ថ្នាក់ទី៦ ចំនួន៩៩នាក់/ស្រី២១នាក់ ក្នុងនោះមុខវិជ្ជាភាសាខ្មែរចំនួន៥០នាក់/ស្រី៣នាក់ ។ មុខវិជ្ជាគណិតវិទ្យាចំនួន៤៩នាក់/ស្រី១៨នាក់ ។២-ថ្នាក់ទី៩ ចំនួន៣៤២នាក់/ស្រី២៥៦នាក់ ក្នុងនោះ មុខវិជ្ជាភាសាខ្មែរ១១៤នាក់/ស្រី៩៦នាក់ , គណិតវិទ្យា១១៤នាក់/ស្រី៧៩នាក់ និងរូបវិទ្យាចំនួន១១៤នាក់/ស្រី៨១នាក់ ។និង
៣-ថ្នាក់ទី១២ ចំនួន២៦៦នាក់/ស្រី១៦៩នាក់ ក្នុងនោះមុខវិជ្ជាភាសាខ្មែរចំនួន៨៩នាក់/ស្រី៦៥នាក់,គណិតវិទ្យា៨៨នាក់/ស្រី៤៤នាក់និងរូបវិទ្យាចំនួន៨៩នាក់/ស្រី៦០នាក់ ។
បើតាមលោក ឈូ ប៊ុនរឿង បើទោះបីខេត្តបន្ទាយមានជ័យ ក៏ដូចខេត្ត៦ខេត្តដែលស្ថិតនៅជាប់ព្រំដែនកម្ពុជា ថៃហើយរងគ្រោះធ្ងន់ធ្ងរដោយសង្គ្រាមនៃបញ្ហាព្រំដែនដែលបង្កឡើងដោយថៃឈ្លានពាន ក្នុងឆ្នាំ២០២៥និងបន្តមកឆ្នាំ២០២៦ ក៏ដោយ ក៏ឆ្នាំសិក្សានេះ ខេត្តបន្ទាយមានជ័យ ក្រោមការគាំទ្រពីក្រសួងអប់រំ យុវជននិងកីឡា អាជ្ញាធរខេត្តនិងដៃគូរពាក់ព័ន្ធនៅតែអាចរៀបចំដំណើរការប្រឡងសិស្សពូកែនេះ ហើយល្អប្រសើរនិងពិសេសជាងឆ្នាំមុនៗផង។
នេះបញ្ជាក់ថា ពេលមានវិបត្តិនិងរងគ្រោះដូច្នេះ គ្រូរឹតតែខំប្រឹងយកចិត្តទុកដាក់បង្រៀន ឯសិស្សរឹតតែខិតខំរៀនសូត្រទ្វេរឡើង ។
ពោលគឺសម្រាប់ថ្នាក់ទី៩នឹងមានការជ្រើសរើសយកជ័យលាភីលេខ១ ក្នុង១ មុខវិជ្ជាទៅប្រឡងទូទាំងប្រទេស ។
ឯទី១២ នឹងមានការជ្រើសរើសយកជ័យលាភីលេខ១និងលេខ២ ក្នុង១ មុខវិជ្ជាទៅប្រឡងទូទាំងប្រទេស ។
ប៉ុន្តែ ក្នុងដំណើរការជ្រើសរើសសិស្សពូកែថ្នាក់ខេត្ត មន្ទីរនឹងជ្រើសរើសយកជ័យលាភីពីលេខ១ដល់លេខ៥ ហើយរដ្ឋបាលខេត្តបានគាំទ្រនិងឧបត្ថម្ភនាថ្ងៃទី២៧ ខែមីនា ឆ្នាំ២០២៦ ខាងមុខនេះ ហើយមន្ទីរនឹងរៀបចំពិធីផ្តល់ដល់ជ័យលាភីនូវមេដាយមាស ប្រាក់និងសំរឹទ្ធិ ដល់ជ័យលាភីលេខ១ដល់លេខ៣ ។និងជូនប័ណ្ណសរសើរដល់ជ័យលាភីលេខ៤និងលេខ៥ ។ ព្រមទាំងផ្តល់នូវសម្ភារ:សិក្សានិងថវិកាផងដែរ ដោយនឹងរកប្រភពឧបត្ថម្ភពីរដ្ឋនិងពីផ្នែកឯកជនឬសប្បុរសជន។
លោកប្រធានមន្ទីរបានបន្ថែមថា : លើសពីនោះ បើទោះបីក្រសួងអប់រំ មិនទាន់ណែនាំ ប៉ុន្តែមានខេត្តមួយចំនួនបានរៀបចំឲ្យមានការប្រឡងសិស្សពូកែថ្នាកទី៦ ក៏ខេត្តបន្ទាយមានជ័យនាឆ្នាំនេះបានរៀបចំសាកល្បងជាពិសេសសផងដែរក្នុងគោលបំណងបណ្តុះសញ្ញាណប្រឡងប្រជែងសិស្សពូកែពីថ្នាក់មូលដ្ឋានតែម្តង ដែលវានឹងជម្រុញឲ្យសិស្សរឹងរឹតតែសម្រួចខិតខំរៀនសូត្រឲ្យពូកែ ឯគ្រូបង្រៀនវិញក៏រឹតតែសម្រួចសម្រាំងចម្រាញ់ការបង្រៀន ៕
.jpg)
