ខេត្តកំពង់ចាម ៖ នៅថ្ងៃទី២៨ ខែសីហា ឆ្នាំ២០២៦ កម្លាំងជំនាញនៃអធិការដ្ឋានរដ្ឋបាលជលផលមេគង្គ សហការជាមួយខណ្ឌរដ្ឋបាលជលផលត្បូងឃ្មុំ បានចុះប្រតិបត្តិការយ៉ាងក្តៅគគុកក្នុងការទប់ស្កាត់ និងបង្ក្រាបបទល្មើសនេសាទខុសច្បាប់ ដោយបានរុះរើ និងបំផ្លាញចោលឧបករណ៍នេសាទខុសច្បាប់ប្រភេទលូស្បៃមុងជាច្រើនកន្លែង ព្រមទាំងបានចាក់លែងកូនត្រី និងវារីសត្វចម្រុះជាច្រើនគីឡូក្រាមចូលទៅក្នុងប្រភពទឹកធម្មជាតិវិញ។
សមត្ថកិច្ចបានចុះល្បាតបង្ក្រាបដោយផ្ទាល់ ដោយរកឃើញនិងបំផ្លាញចោលនូវបទល្មើសនេសាទខុសច្បាប់ចំនួន ២ករណី ស្ថិតក្នុងភូមិសាស្ត្រស្រុកកំពង់សៀម ខេត្តកំពង់ចាម រួមមាន ៖
ករណីទី១ នៅចំណុចភូមិរអាងលើ ឃុំរអាង បានរុះរើ និងបំផ្លាញចោលឧបករណ៍លូស្បៃមុងចំនួន១២មាត់, របាំងស្បៃមុងប្រវែង ៥៤០ម៉ែត្រ, បង្គោលចម្រឹងចំនួន ១៨០ដើម និងបានចាក់លែងកូនត្រីចម្រុះទម្ងន់ ៤២គីឡូក្រាម ចូលទៅក្នុងទឹកវិញ។
ករណីទី២ នៅចំណុចអិនតានេល ឃុំគៀនជ្រៃ បានបំផ្លាញចោលឧបករណ៍លូស្បៃមុងចំនួន១៥មាត់, របាំងស្បៃមុងប្រវែង៦៧៥ម៉ែត្រ, បង្គោលចម្រឹងចំនួន២២៥ដើម ព្រមទាំងចាក់លែងកូនត្រីចម្រុះទម្ងន់ ៥៥គីឡូក្រាម។
ក្នុងថ្ងៃដដែលនោះផងដែរ អធិការដ្ឋានរដ្ឋបាលជលផលមេគង្គ បានបន្តកិច្ចសហការជាមួយខណ្ឌរដ្ឋបាលជលផលត្បូងឃ្មុំ ចុះបង្ក្រាបបាន ១ករណីបន្ថែមទៀត ដោយបានធ្វើការរុះរើ និងបំផ្លាញចោលឧបករណ៍ស្បៃមុងខុសច្បាប់នៅនឹងកន្លែង រួមមាន៖ ឧបករណ៍លូស្បៃមុងចំនួន ២២មាត់, របាំងស្បៃមុងប្រវែង ១.១០០ម៉ែត្រ, បង្គោលចម្រឹងចំនួន ៣៣០ដើម និងបានចាក់លែងកូនត្រី ព្រមទាំងវារីសត្វចម្រុះសរុបប្រមាណ ១០០គីឡូក្រាម ចូលទៅក្នុងដែនទឹកធម្មជាតិវិញដោយសុវត្ថិភាព។
សរុបលទ្ធផលរួមក្នុងប្រតិបត្តិការពេញមួយថ្ងៃនេះ សមត្ថកិច្ចបានបំផ្លាញចោលឧបករណ៍លូស្បៃមុងសរុបចំនួន ៤៩មាត់, របាំងស្បៃមុងប្រវែង ២.៣១៥ម៉ែត្រ, បង្គោលចម្រឹង ៧៣៥ដើម និងបានសង្គ្រោះជីវិតកូនត្រី-វារីសត្វចម្រុះដោយចាក់លែងចូលធម្មជាតិវិញសរុប ១៩៧គីឡូក្រាម។ សកម្មភាពចុះបង្ក្រាបយ៉ាងក្តៅគគុកនេះ ធ្វើឡើងក្នុងគោលបំណងការពារ និងអភិរក្សធនធានមច្ឆជាតិឱ្យបានគង់វង្ស ជាពិសេសក្នុងរដូវបិទនេសាទ ដើម្បីទុកឱកាសឱ្យពូជត្រីបានពងកូន និងរីកធំធាត់ សម្រាប់បម្រើផលប្រយោជន៍ដល់ជីវភាពប្រជាពលរដ្ឋ និងសេដ្ឋកិច្ចជាតិរយៈពេលវែង៕
