ខេត្តមណ្ឌលគិរី ៖ កម្លាំងស្នាក់ការសត្វព្រៃអូរល្វេ សហការជាមួយស្នាក់ការម្រើច និងស្នាក់ការឈួល នៃដែនជម្រកសត្វព្រៃស្រែពក បានចុះបង្ក្រាបករណីបទល្មើសសត្វព្រៃ ស្ថិតនៅចំណុចផ្លូវលេខ១៤ ក្នុងភូមិកោះម្យើលលើ ឃុំណងឃីលឹក ស្រុកកោះញែក ខេត្តមណ្ឌលគិរី ដោយដកហូតបានសាកសពសត្វព្រៃចំនួន ៣ក្បាល។
តាមប្រភពព័ត៌មានពីសមត្ថកិច្ចបានឱ្យដឹងថា ប្រតិបត្តិការនេះបានធ្វើឡើងកាលពីថ្ងៃទី៥ ខែសីហា។ ក្នុងអំឡុងពេលចុះល្បាត កម្លាំងជំនាញបានជួបប្រទះមុខសញ្ញាជនសង្ស័យចំនួន ២នាក់។ ទោះជាយ៉ាងណា នៅពេលឃើញសមត្ថកិច្ច ជនសង្ស័យបានសម្រេចចិត្ត ផ្តួលម៉ូតូចោល រួចរត់គេចខ្លួនចូលព្រៃ បាត់ស្រមោល។
ក្នុងការចុះឆែកឆេរនៅទីតាំងកើតហេតុ សមត្ថកិច្ចបានដកហូតវត្ថុតាងរួមមាន៖
សាកសពជ្រូកព្រៃ៖ ១ក្បាល
សាកសពឈ្លូស៖ ២ក្បាល
ម៉ូតូ៖ ១គ្រឿង (ជារបស់ជនសង្ស័យ)
ចំពោះសាកសពសត្វព្រៃទាំង ៣ក្បាល ត្រូវបានកម្លាំងជំនាញដុតបំផ្លាញចោលភ្លាមៗនៅនឹងកន្លែងកើតហេតុ តាមនីតិវិធី។ រីឯវត្ថុតាងម៉ូតូ ត្រូវបានយកទៅរក្សាទុកនៅស្នាក់ការ ដើម្បីស្រាវជ្រាវ និងចាត់ការតាមផ្លូវច្បាប់បន្ថែមទៀត៕
