ខេត្តកំពង់ធំ ៖ អាជ្ញាធរខេត្តកំពង់ធំបានចុះអនុវត្តវិធានការក្តៅ ដោយបិទទីតាំងអាជីវកម្មរបស់ក្រុមហ៊ុន «ប្រាសាទមាស ភីអេសអិល ឯ.ក» ចំនួន ២កន្លែងភ្លាមៗ ស្ថិតនៅក្នុងស្រុកស្ទោង បន្ទាប់ពីរកឃើញថា ក្រុមហ៊ុននេះបានបើកប្រតិបត្តិការដោយគ្មានលិខិតអនុញ្ញាតពីស្ថាប័នមានសមត្ថកិច្ច។
ប្រតិបត្តិការនេះបានធ្វើឡើងនៅថ្ងៃទី២០ ខែសីហា ឆ្នាំ២០២៦ ដឹកនាំផ្ទាល់ដោយលោក សាយ គឹមឡម អភិបាលស្រុកស្ទោង ដោយមានការចូលរួមពីកងកម្លាំងចម្រុះ។ ការចុះបិទអាជីវកម្មនេះ គឺធ្វើឡើងដើម្បីអនុវត្តតាម ស.ជ.ណ របស់រដ្ឋបាលខេត្តកំពង់ធំ លេខ ៤៣៥/២៦ សជណ ចុះថ្ងៃទី១៨ ខែសីហា ឆ្នាំ២០២៦។ ទីតាំងទាំង ២ ដែលត្រូវបិទទ្វារនោះ រួមមាន ៖
ទីតាំងទី១៖ ស្ថិតនៅក្នុងភូមិឈើទាល ឃុំកំពង់ចិនត្បូង ស្រុកស្ទោង
ទីតាំងទី២៖ ស្ថិតនៅក្នុងភូមិអង់ឃ្លាំ ឃុំប្រឡាយ ស្រុកស្ទោង
ការបង្ក្រាបនិងបិទទីតាំងអាជីវកម្មអត់ច្បាប់នេះ គឺជាវិធានការចាំបាច់ក្នុងការអនុវត្តច្បាប់ និងពង្រឹងសន្តិសុខ សណ្ដាប់ធ្នាប់សាធារណៈនៅក្នុងមូលដ្ឋាន។ ជាមួយគ្នានេះ វាក៏ជាការបញ្ជូនសារព្រមានយ៉ាងច្បាស់ៗ ទៅកាន់ក្រុមហ៊ុន ឬអាជីវកម្មទាំងឡាយណាដែលកំពុងដំណើរការដោយគ្មានអាជ្ញាប័ណ្ណ ត្រូវតែប្រឈមមុខនឹងការបិទ ឬផ្អាកសកម្មភាពជាដាច់ខាត។
ចំណាត់ការយ៉ាងក្តៅគគុកនេះ បង្ហាញពីការយកចិត្តទុកដាក់ខ្ពស់របស់អាជ្ញាធរក្នុងការការពារផលប្រយោជន៍ និងទ្រព្យសម្បត្តិរបស់ប្រជាពលរដ្ឋ ដើម្បីទប់ស្កាត់ការកេងប្រវ័ញ្ច និងការបោកប្រាស់ផ្សេងៗ។ សកម្មភាពឆ្លើយតបទាន់ពេលវេលានេះ ទទួលបានការគាំទ្រ និងកោតសរសើរយ៉ាងខ្លាំងពីសំណាក់មហាជនក្នុងមូលដ្ឋាន។
នៅក្នុងឱកាសនោះដែរ លោក សាយ គឹមឡម បានអំពាវនាវដល់បងប្អូនប្រជាពលរដ្ឋទាំងអស់ ឱ្យមានការប្រុងប្រយ័ត្នខ្ពស់ចំពោះគ្រឹះស្ថាន ឬអង្គភាពផ្តល់កម្ចីគ្មានអាជ្ញាប័ណ្ណត្រឹមត្រូវ ដែលទារអត្រាការប្រាក់ខ្ពស់ហួសហេតុ។ លោកក៏បានស្នើឱ្យប្រជាពលរដ្ឋ និងអាជ្ញាធរមូលដ្ឋាន ចូលរួមសហការរាយការណ៍ជាបន្ទាន់ ប្រសិនបើជួបករណីមិនប្រក្រតី ដើម្បីឱ្យសមត្ថកិច្ចចុះជួយអន្តរាគមន៍បានទាន់ពេលវេលា៕
