ខេត្តកំពង់ធំ ៖ នៅព្រឹកថ្ងៃទី៧ ខែសីហា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ បាននាំយកប្រេងឥន្ធនៈចំនួន ១,២០០លីត្រ ដែលជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈ ឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ប្រគល់ជូនអាជ្ញាធរឃុំចំនួន៣ សម្រាប់ដំណើរការសាឡាងចម្លង។ ពិធីប្រគល់ និងទទួលនេះ បានប្រព្រឹត្តទៅនៅកំពង់ចម្លង ឃុំមានជ័យ ស្រុកសណ្តាន់ ដោយមានការចូលរួមយ៉ាងច្រើនកុះករពីសំណាក់ព្រះសង្ឃ ប្រជាពលរដ្ឋ និងសិស្សានុសិស្ស។
ឧត្តមសេនីយ៍ទោ សោម ស៊ុន បានបញ្ជាក់ថា ប្រេងឥន្ធនៈទាំង ១,២០០លីត្រនេះ ត្រូវបានបែងចែកជូន៖
ឃុំមានជ័យ និងឃុំខ្លែង៖ ទទួលបានប្រេងចំនួន ៧០០ លីត្រ (សម្រាប់សាឡាង ១គ្រឿង)
ឃុំដងកាំបិត៖ ទទួលបានប្រេងចំនួន ៥០០ លីត្រ (សម្រាប់សាឡាង ១គ្រឿង)
ប្រេងឥន្ធនៈទាំងនេះ នឹងត្រូវប្រគល់ជូនប្រធានក្រុមប្រឹក្សាឃុំទាំងបី សម្រាប់ប្រើប្រាស់ក្នុងខែសីហា ឆ្នាំ២០២៦ នេះ ដើម្បីដំណើរការសាឡាងចំនួន ២គ្រឿង ក្នុងការដឹកជញ្ជូនប្រជាពលរដ្ឋ និងសិស្សានុសិស្សធ្វើដំណើរឆ្លងកាត់ដងស្ទឹងសែន ដោយសុវត្ថិភាព។ ដោយឡែក ការតម្រូវប្រើប្រាស់ប្រេងសម្រាប់ខែកញ្ញា និងខែតុលា ក្រុមការងារនឹងបន្តដោះស្រាយជូននៅពេលខាងមុខបន្ថែមទៀត។
លោកមេបញ្ជាការ ក៏បានរំលឹកផងដែរថា កាលពីរដូវវស្សាឆ្នាំ២០២៥ កន្លងទៅ សម្ដេចធិបតី និងលោកជំទាវបណ្ឌិត តាមរយៈឯកឧត្តម នួន ផារ័ត្ន អភិបាលខេត្តកំពង់ធំ បានឧបត្ថម្ភសាឡាងចំនួន ២គ្រឿងនេះ ដើម្បីដោះស្រាយការលំបាក និងធានាសុវត្ថិភាពជូនពលរដ្ឋ ជំនួសឲ្យការធ្វើដំណើរតាមទូក និងកាណូតតូចៗដែលប្រឈមនឹងគ្រោះថ្នាក់។ ជាមួយគ្នានេះ លោកបានផ្តាំផ្ញើដល់អាជ្ញាធរដែនដី និងក្រុមបច្ចេកទេស បើកបរសាឡាង ត្រូវថែរក្សាសម្ភារបច្ចេកទេស និងប្រើប្រាស់ប្រេងឥន្ធនៈឱ្យចំគោលដៅ ជាមួយនឹងស្មារតីទទួលខុសត្រូវខ្ពស់។
តំណាងឱ្យប្រជាពលរដ្ឋរស់នៅក្នុងឃុំទាំងបី លោកស្រី ឡាក់ សៅចាន់ អភិបាលរងស្រុកសណ្ដាន់ បានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅបំផុតជូនចំពោះ សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ព្រមទាំងឯកឧត្តមនាយឧត្តមសេនីយ៍ ម៉ៅ សុផាន់, ឯកឧត្តម នួន ផារ័ត្ន និងឧត្តមសេនីយ៍ទោ សោម ស៊ុន ដែលតែងតែយកចិត្តទុកដាក់ និងជួយដោះស្រាយរាល់ទុក្ខលំបាករបស់ប្រជាពលរដ្ឋក្នុងមូលដ្ឋានបានទាន់ពេលវេលា៕
