ខេត្តកំពង់ធំ ៖ នៅព្រឹកថ្ងៃទី ០៨ ខែកក្កដា ឆ្នាំ ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានប្រចាំការសមាគមអតីតយុទ្ធជនកម្ពុជាខេត្ត តំណាងឯកឧត្តម នួន ផារ័ត្ន អភិបាលខេត្ត និងជាប្រធានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ អមដំណើរដោយលោក ជុំ វីរៈ អភិបាលរងស្រុកសន្ទុក បានដឹកនាំសហការីចុះត្រួតពិនិត្យផ្ទះចំនួន ៣៥ខ្នងថ្មីបន្ថែមទៀត នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីង ស្ថិតក្នុងឃុំក្រយា ស្រុកសន្ទុក ខេត្តកំពង់ធំ។
ផ្ទះទាំង ៣៥ ខ្នងនេះ គឺជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើម្បីសាងសង់ជូនបងប្អូនអតីតយុទ្ធជនដែលគ្មានដី គ្មានផ្ទះ ឬរស់នៅលើដីសាធារណៈ នៅក្នុងភូមិសាស្ត្រខេត្តកំពង់ធំ។
លទ្ធផលនៃការកសាងផ្ទះជូនអតីតយុទ្ធជន
ឧត្តមសេនីយ៍ទោ សោម ស៊ុន បានបញ្ជាក់ថា កន្លងមកនៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោធិបតីថ្លុកព្រីងនេះ ធ្លាប់បានសាងសង់ផ្ទះ និងផ្តល់ដីសម្បទានសង្គមកិច្ចជូនអតីតយុទ្ធជនបានចំនួន ២០៦ គ្រួសាររួចមកហើយ។ នេះជាការគិតគូររបស់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធានប្រចាំការ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា។
សរុបមកដល់ពេលនេះ ផ្ទះចំនួន ២៤១ ខ្នង ហើយ ត្រូវបានសាងសង់រួចរាល់នៅក្នុងមណ្ឌលអភិវឌ្ឍន៍មួយនេះ។
ការត្រៀមប្រគល់ផ្ទះដោយតម្លាភាព លោកមេបញ្ជាការបានបន្ថែមទៀតថា ចំពោះផ្ទះថ្មីចំនួន ៣៥ខ្នងដែលទើបសាងសង់រួចរាល់នេះ នឹងត្រូវរៀបចំពិធីចាប់ឆ្នោតប្រគល់ជូនបងប្អូនអតីតយុទ្ធជននៅពេលខាងមុខ។ បច្ចុប្បន្ន គណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ កំពុងចុះធ្វើអធិការកិច្ច ពិនិត្យស្រាវជ្រាវចំពោះគ្រួសារដែលបានស្នើសុំ ដើម្បធានាឱ្យបាននូវសុក្រឹតភាព តម្លាភាព និងដោះស្រាយបានចំគោលដៅអ្នកដែលខ្វះខាតពិតប្រាកដ។
ក្នុងនាមឯកឧត្តម នួន ផារ័ត្ន និងតំណាងឱ្យបងប្អូនអតីតយុទ្ធជនទាំងអស់ ឧត្តមសេនីយ៍ទោ សោម ស៊ុន បានសម្តែងនូវការគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង សម្តេចមហាបវរធិបតី ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់ ដោះស្រាយរាល់ការលំបាកជូនអតីតយុទ្ធជន និងបានគោរពជូនពរសម្តេច និងលោកជំទាវ សូមមានសុខភាពល្អបរិបូរណ៍ អាយុយឺនយូរ ដើម្បីបន្តដឹកនាំកម្ពុជាក្នុងសុខសន្តិភាព និងការអភិវឌ្ឍជានិរន្តរ៍៕
