ខេត្តកំពង់ធំ ៖ បើទោះបីជាអាជ្ញាធរ និងសមត្ថកិច្ចជំនាញបានយាមល្បាត និងចុះបង្ក្រាបបទល្មើសដូចភ្លៀងរលឹមយ៉ាងណាក៏ដោយ ក៏សកម្មភាពលួចលាក់នេសាទខុសច្បាប់ហាក់មិនទាន់មានការថយចុះឡើយ។ ជាក់ស្តែង ក្នុងរយៈពេលប៉ុន្មានថ្ងៃនេះ កម្លាំងជំនាញចម្រុះក្នុងខេត្តកំពង់ធំ បានបន្តយុទ្ធនាការចុះទប់ស្កាត់ និងបង្ក្រាបបទល្មើសជលផលក្នុងភូមិសាស្ត្របឹងទន្លេសាបជាបន្តបន្ទាប់ ដើម្បីការពារធនធានមច្ឆជាតិក្នុងរដូវបិទនេសាទ (រដូវត្រីពងកូន)។
យោងតាមរបាយការណ៍ពីមន្ត្រីមូលដ្ឋាន បានឱ្យដឹងថា កាលពីថ្ងៃទី១៥ ខែកក្កដា ឆ្នាំ២០២៦ លោក លឹម សុថាត នាយសង្កាត់រដ្ឋបាលជលផលកំពង់ស្វាយក្រោម បានដឹកនាំកម្លាំងមន្ត្រីជំនាញ និងមន្ត្រីជាប់កិច្ចសន្យា សហការជាមួយកម្លាំងកងរាជអាវុធហត្ថស្នាក់ការ B06 ចុះល្បាតទប់ស្កាត់ និងបង្ក្រាបបទល្មើសជលផលយ៉ាងសកម្ម នៅចំណុចព្រែកឆ្កោក ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។
ដោយឡែក នៅក្នុងភូមិសាស្ត្រស្រុកស្ទោង លោក ហួន ផល នាយសង្កាត់រដ្ឋបាលជលផលពាមបាង ក៏បានដឹកនាំមន្រ្តីជំនាញ សហការជាមួយលោកអនុសេនីយ៍ឯក លុយ សុភាព នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ (យោធភូមិភាគទី៤) និងកម្លាំងទីបញ្ជាការស្រាលប្រចាំការឃុំពាមបាង បានចេញប្រតិបត្តិការត្រួតពិនិត្យ និងបង្រ្កាបបទល្មើសនេសាទយ៉ាងក្តៅគគុក ចាប់ពីចំណុចព្រែកពាមឆេះកែវ ដល់ពេជ្រចក្រី ក្នុងឃុំពាមបាង ស្រុកស្ទោង ផងដែរ។
ជាលទ្ធផល នៅក្នុងកិច្ចប្រតិបត្តិការជុំវិញតំបន់បឹងទន្លេសាបនេះ កម្លាំងជំនាញចម្រុះសម្រេចបានលទ្ធផលចំនួន ១ករណីធំ ដោយបានធ្វើការរុះរើ និងបំផ្លាញចោលនូវឧបករណ៍នេសាទខុសច្បាប់នៅនឹងកន្លែង រួមមាន៖
របាំងព្រួលកាត់ព្រែក៖ ចំនួន ១៧របាំង (ប្រវែងសរុប ៥២០ម៉ែត្រ)
ឡុកស្បៃមុង៖ ចំនួន ១៣គ្រឿង
លូ ឬលបស្បៃមុង៖ ចំនួន ១៦មាត់
បង្គោលឈើ៖ ចំនួន ១០០ដើម
ជុំវិញចំណាត់ការនេះ ប្រជាពលរដ្ឋ និងមហាជនបានសម្តែងការគាំទ្រចំពោះចំណាត់ការក្តៅរបស់សមត្ថកិច្ច ៕
