ព័ត៌មានអន្តរជាតិ ៖ លោក Abbas Goudarzi អ្នកនាំពាក្យនៃសភាអ៊ីរ៉ង់ បាននិយាយថា អ៊ីរ៉ង់ កំពុងសម្លឹងមើលការធ្វើជាតូបនីយកម្មច្រកសមុទ្រ Hormuz ដូចអ្វីដែលខ្លួនបានធ្វើលើវិស័យប្រេងដែរ។
ទីភ្នាក់ងារសារព័ត៌មាន ISNA បានដកស្រង់សម្តីរបស់លោកថា ជាមួយនឹងការធ្វើជាតូបនីយកម្មនៃវិស័យប្រេង បានបង្ហាញពីសារៈសំខាន់នៃការសម្រេចចិត្តនៅពេលនោះ។ យើងចង់ធ្វើជាតូបនីយកម្មច្រកសមុទ្រ Hormuz មួយទៀត។
ទីភ្នាក់ងារសារព័ត៌មាន Tasnim បានរាយការណ៍នៅថ្ងៃទី ១ ខែមិថុនាថា អ៊ីរ៉ង់បានត្រៀមខ្លួនរួចជាស្រេចដើម្បីបិទច្រកសមុទ្រ Hormuz ទាំងស្រុង និងបង្កើនប្រតិបត្តិការនៅក្នុងច្រកសមុទ្រ Bab El Mandeb ដើម្បីដាក់សម្ពាធលើអ៊ីស្រាអែលឱ្យឆ្ពោះទៅរកបទឈប់បាញ់។
គួររំលឹកថា សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងធំៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ កងឆ្មាំបដិវត្តន៍អ៊ីស្លាម បានប្រកាសពីប្រតិបត្តិការសងសឹក ដោយកំណត់គោលដៅទីតាំងនានានៅក្នុងប្រទេសអ៊ីស្រាអែល។ មូលដ្ឋានយោធាអាមេរិកនៅបារ៉ែន ហ្ស៊កដានី គុយវ៉ែត កាតា អារ៉ាប៊ីសាអូឌីត និងអារ៉ាប់រួម ក៏ត្រូវបានវាយប្រហារផងដែរ។ មេដឹកនាំកំពូល អាយ៉ាតូឡា អាលី ខាមេនី និងមេដឹកនាំសំខាន់ៗរបស់អ៊ីរ៉ង់មួយចំនួនទៀត ត្រូវបានសម្លាប់នៅក្នុងការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែល៕
