ខេត្តបន្ទាយមានជ័យ ៖ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចាប់ឃាត់ខ្លួនម្ចាស់ហាងកែសម្ផស្សម្នាក់ បន្ទាប់ពីបានប្រព្រឹត្តអំពើហិង្សាយ៉ាងធ្ងន់ធ្ងរ និងបង្ខាំងមនុស្សដោយខុសច្បាប់ ទៅលើស្ត្រីវ័យចំណាស់ម្នាក់ ដែលជាអ្នកអនាម័យស្នាក់នៅជាមួយគ្នា។
ជនសង្ស័យឈ្មោះ គុំ លីកា ហៅ កាកា ភេទស្រី អាយុ ៣០ឆ្នាំ ជាម្ចាស់ហាង «កាកាសាឡន» មានទីលំនៅភូមិបាលិលេយ្យ១ ក្រុងប៉ោយប៉ែត។
ជនរងគ្រោះឈ្មោះ អ៊ុត ខុន ភេទស្រី អាយុ ៥៩ឆ្នាំ មុខរបរជាអ្នកអនាម័យ (ដែលជនសង្ស័យធ្លាប់ប្រកាសថាចាត់ទុកដូចម្តាយ និងបានស្នាក់នៅជាមួយគ្នា ៣ឆ្នាំមកហើយ) មានស្រុកកំណើតនៅភូមិប្រជាធម្មលិច ក្រុងប៉ោយប៉ែត។
ដើមចមនៃសាច់រឿងយោងតាមប្រភពព័ត៌មានបានឱ្យដឹងថា មុនពេលកើតហេតុ បុរសជនជាតិចិនម្នាក់ដែលត្រូវជាសង្សាររបស់ឈ្មោះ កាកា បានយកទូរស័ព្ទ និងកុំព្យូទ័រជាច្រើនគ្រឿងមកផ្ញើទុកនៅហាង។
នៅក្នុងអំឡុងពេលធ្វើអនាម័យ ស្ត្រីរងគ្រោះបានឃើញទូរស័ព្ទចំនួន ៣គ្រឿង ធ្លាក់មកក្រៅ ក៏បានរើសយកទៅលក់ឱ្យអ្នកទិញទូរស័ព្ទខូចៗតាមដងផ្លូវ ដោយដូរបានប្រាក់ចំនួន ២០០,០០០ រៀល។
លុះពេលម្ចាស់ហាង (កាកា) ដឹងរឿង ក៏បានចោទប្រកាន់ស្ត្រីរងគ្រោះថាជាចោរលួច និងបានផ្ទុះកំហឹងយ៉ាងខ្លាំង រហូតឈានដល់ការប្រើប្រាស់ហិង្សាដោយចេតនាមានស្ថានទម្ងន់ទោស ព្រមទាំងចាប់ឃុំឃាំង និងបង្ខាំងស្ត្រីរងគ្រោះដោយខុសច្បាប់។ សកម្មភាពដ៏ឃោរឃៅនេះ ត្រូវបានគេលួចថតជាវីដេអូឃ្លីប និងបែកធ្លាយពេញបណ្តាញសង្គម បង្កឱ្យមានការរិះគន់យ៉ាងខ្លាំងពីមហាជន។
ពេលវេលានិងទីតាំងកើតហេតុ៖ ករណីនេះបានប្រព្រឹត្តទៅចាប់ពីថ្ងៃទី១១ ដល់ថ្ងៃទី១៤ ខែមិថុនា ឆ្នាំ២០២៦ នៅចំណុចបុរីសានកូ (ស្ថិតក្នុងភូមិ/សង្កាត់ផ្សារកណ្តាល) និងនៅចំណុចហាង «កាកាសាឡន» (ភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត)។
ក្រោយពីទទួលបានព័ត៌មាន និងភស្តុតាង កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកអនុសេនីយ៍ឯក តិល តៃលីវ មេបញ្ជាការ បានចុះធ្វើការស្រាវជ្រាវយ៉ាងយកចិត្តទុកដាក់ រហូតឈានដល់ការចាប់ខ្លួនជនសង្ស័យឈ្មោះ កាកា នៅថ្ងៃទី២៨ ខែមិថុនា ឆ្នាំ២០២៦។
បច្ចុប្បន្ន ជនសង្ស័យត្រូវបានបញ្ជូនទៅឃុំខ្លួនបណ្តោះអាសន្ននៅថ្ងៃទី២៩ ខែមិថុនា ឆ្នាំ២០២៦ នេះ ដើម្បីបន្តនីតិវិធីច្បាប់៕
