ព័ត៌មានអន្តរជាតិ ៖ កងទ័ពអាមេរិកប្រមាណ ១៥.០០០ នាក់ រួមទាំងនាវាពិឃាត និងយន្តហោះជាង ១០០ គ្រឿងនឹងចូលរួមក្នុងប្រតិបត្តិការ “Project Freedom” ដើម្បីរំដោះកប៉ាល់ដែលត្រូវបានរារាំងនៅក្នុងច្រកសមុទ្រ Hormuz ដោយសារតែជម្លោះយោធារវាងសហរដ្ឋអាមេរិក និងអ៊ីរ៉ង់។ នេះបើយោងតាមបញ្ជាការកណ្តាលសហរដ្ឋអាមេរិក (CENTCOM)។
CENTCOM បានបញ្ជាក់នៅក្នុងសេចក្តីថ្លែងការណ៍មួយថា ការគាំទ្រផ្នែកយោធារបស់សហរដ្ឋអាមេរិកចំពោះប្រតិបត្តិការ “Project Freedom” នឹងរួមមាននាវាពិឃាតបំពាក់មីស៊ីល, យន្តហោះចម្បាំងដែនគោក និងសមុទ្រជាង ១០០ គ្រឿង និងបុគ្គលិកយោធាចំនួន ១៥.០០០ នាក់។
លោកប្រធានាធិបតីអាមេរិក ដូណាល់ ត្រាំ បានប្រកាសពីការចាប់ផ្តើមប្រតិបត្តិការ “Project Freedom” នៅថ្ងៃចន្ទនេះ ដើម្បីជួយកប៉ាល់ដែលជាប់គាំងចាកចេញពីច្រកសមុទ្រ Hormuz ដោយសារតែជម្លោះរវាងសហរដ្ឋអាមេរិក និងអ៊ីរ៉ង់។
លោក ត្រាំ បានសង្កត់ធ្ងន់ថា ការជ្រៀតជ្រែកណាមួយនៃប្រតិបត្តិការនេះ នឹងត្រូវដោះស្រាយដោយបង្ខំ។
គួរបញ្ជាក់ថា លោក ត្រាំ មិនបានបញ្ជាក់ពីចំនួនកប៉ាល់ដែលត្រូវជាប់គាំងនៅច្រក Hormuz នោះទេ ប៉ុន្តែប្ដេជ្ញាការពារ និងនាំកប៉ាល់ទាំងនោះចាកចេញពីច្រកនេះដោយសុវត្ថិភាព។
ចំណែកកងកម្លាំងប្រដាប់អាវុធរបស់អ៊ីរ៉ង់ នៅតែបន្តគ្រប់គ្រងច្រកសមុទ្រ Hormuz ហើយកំពុងជំរុញឱ្យកប៉ាល់ទាំងអស់ជៀសវាងការឆ្លងកាត់ផ្លូវទឹកមួយនេះ ដោយគ្មានការសម្របសម្រួលជាមួយទីក្រុងតេអេរ៉ង់។ នេះបើយោងតាមលោក Ali Abdollahi មេបញ្ជាការនៃទីស្នាក់ការកណ្តាល Khatam al-Anbiya របស់អ៊ីរ៉ង់។
ទូរទស្សន៍រដ្ឋអ៊ីរ៉ង់ បានដកស្រង់សម្តីរបស់លោក ដោយនិយាយថា យើងកំពុងធ្វើអ្វីគ្រប់យ៉ាងដែលអាចធ្វើទៅបានដើម្បីធានាសន្តិសុខនៃច្រកសមុទ្រ Hormuz និងគ្រប់គ្រងស្ថានការណ៍។ យើងជំរុញឱ្យកប៉ាល់ដឹកទំនិញ និងកប៉ាល់ដឹកប្រេងទាំងអស់ជៀសវាងការប៉ុនប៉ងឆ្លងកាត់ ដោយគ្មានការសម្របសម្រួលជាមុនជាមួយកងកម្លាំងប្រដាប់អាវុធអ៊ីរ៉ង់ដែលឈរជើងនៅច្រកសមុទ្រ Hormuz ដើម្បីកុំឱ្យមានការគំរាមកំហែង។
ទន្ទឹមនោះ លោក Abdollahi បានព្រមានថា កងកម្លាំងប្រដាប់អាវុធបរទេសណាមួយ ជាពិសេសកងទ័ពសហរដ្ឋអាមេរិក នឹងត្រូវបានកំណត់គោលដៅ ប្រសិនបើពួកគេព្យាយាមចូលទៅជិត ឬចូលទៅក្នុងច្រកសមុទ្រ Hormuz ។
គួរបញ្ជាក់ថា សហរដ្ឋអាមេរិក ក្រោមបញ្ជារបស់លោក ត្រាំ បានប្រកាសចាប់ផ្ដើមប្រតិបត្តិការ “Project Freedom” ដែលជាផែនការក្នុងការជួយរំដោះកប៉ាល់ជាប់គាំងដោយសារសង្គ្រាមឱ្យចាកចេញពីច្រក Hormuz ៕
