ព័ត៌មានអន្តរជាតិ ៖ ទីភ្នាក់ងារសារព័ត៌មានរដ្ឋស៊ីនហួ បានរាយការណ៍នៅថ្ងៃសៅរ៍នេះថា ការផ្ទុះឧស្ម័ននៅអណ្តូងរ៉ែធ្យូងថ្មមួយក្នុងខេត្តសានស៊ីភាគខាងជើងប្រទេសចិន បានសម្លាប់មនុស្សយ៉ាងហោចណាស់ ៨២នាក់។
ការផ្ទុះនេះបានកើតឡើង កាលពីល្ងាចថ្ងៃសុក្រ នៅអណ្តូងរ៉ែធ្យូងថ្ម Liushenyu ក្នុងស្រុក Qinyuan ជាកន្លែងដែលមានកម្មករចំនួន ២៤៧ នាក់ ស្ថិតនៅក្រោមដីនៅពេលកើតហេតុ។
ក្រុមឆ្លើយតបបន្ទាន់ នៅតែត្រូវបានដាក់ពង្រាយនៅកន្លែងកើតហេតុ ខណៈដែលកិច្ចខិតខំប្រឹងប្រែងបន្តជួយសង្គ្រោះកម្មករដែលបាត់ខ្លួន និងវាយតម្លៃពីវិសាលភាពពេញលេញនៃសោកនាដកម្មនេះ។
ការស៊ើបអង្កេតក៏ត្រូវបានចាប់ផ្តើម ជុំវិញគ្រោះមហន្តរាយនេះផងដែរ។
លោកប្រធានាធិបតី ស៊ី ជីនពីង បានអំពាវនាវឱ្យមានកិច្ចខិតខំប្រឹងប្រែងជួយសង្គ្រោះយ៉ាងពេញទំហឹងសម្រាប់អ្នកដែលបាត់ខ្លួន និងការព្យាបាលជាបន្ទាន់សម្រាប់អ្នករងរបួស។ លោកក៏បានបញ្ជាឱ្យមានការស៊ើបអង្កេតយ៉ាងហ្មត់ចត់អំពីមូលហេតុនៃគ្រោះមហន្តរាយនេះ ហើយសង្កត់ធ្ងន់ថា ការទទួលខុសត្រូវត្រូវតែត្រូវបានអនុវត្តស្របតាមច្បាប់។
ទន្ទឹមនោះ លោក បានជំរុញឱ្យអាជ្ញាធរទូទាំងប្រទេសពង្រឹងការត្រួតពិនិត្យសុវត្ថិភាពកន្លែងធ្វើការ និងបង្កើនកិច្ចខិតខំប្រឹងប្រែងដើម្បីលុបបំបាត់ហានិភ័យ ដើម្បីការពារគ្រោះថ្នាក់ស្រដៀងគ្នានេះ។
លោកនាយករដ្ឋមន្ត្រី លី ឈៀង បានដឹកនាំមន្ត្រីឱ្យបង្កើនការសម្របសម្រួលការជួយសង្គ្រោះ និងបានអំពាវនាវឱ្យមានការផ្លាស់ប្តូរសុវត្ថិភាពកាន់តែទូលំទូលាយនៅក្នុងឧស្សាហកម្មសំខាន់ៗ ខណៈដែលលោកឧបនាយករដ្ឋមន្ត្រី ចាង គួឈីង ត្រូវបានបញ្ជូនទៅកន្លែងកើតហេតុដើម្បីត្រួតពិនិត្យប្រតិបត្តិការឆ្លើយតបបន្ទាន់ និងជួយសង្គ្រោះ៕
