ខេត្តរតនគិរី ៖ សិស្សសាលា២នាក់បានលង់ទឹកស្លាប់ ក្នុងចំណោមសិស្សសាលា១០នាក់ នៅត្រង់ចំណុចអន្លុងទឹកជួរ ខាងលើវត្តស្រែអង្គ្រង ក្នុងឃុំស្រែអង្រ្គង ស្រុកកូនមុំ ខេត្តរតនគិរី។
លោក សាធ គន្ធា អធិការស្ដីទីស្រុកកូនមុំ បានឲ្យដឹងនៅល្ងាចថ្ងៃទី១៣ ឧសភា ថា ជនរងគ្រោះ ១.ឈ្មោះ ហៀង លីណា ភេទស្រី អាយុ២០ឆ្នាំ ជនជាតិខ្មែរ មុខរបរសិស្សថ្នាក់ទី១២C រស់នៅភូមិ២ ឃុំត្រពាំងក្រហម ស្រុកកូនមុំ ខេត្តរតនគិរី ២.ឈ្មោះ ប៊ូច គីឡឹង ភេទប្រុស អាយុ១៩ឆ្នាំ ជនជាតិខ្មែរ មុខរបរសិស្សថ្នាក់ទី១២B រស់នៅភូមិ៣ ឃុំស្រែអង្គ្រង ស្រុកកូនមុំ ខេត្តរតនគិរី។
លោក សាធ គន្ធា បានបញ្ជាក់ថា ឧប្បហេតុនៅចន្លោះម៉ោង១៤ ថ្ងៃទី១៣ ខែឧសភា ឆ្នាំ២០២៦ សិស្សសាលាមានគ្នា១០នាក់បាននាំគ្នាទៅងូតទឹកលេង ខណៈពេលនោះឈ្មោះ ហៀង លីណា ភេទស្រី ក៏បានចុះទៅលេងទឹកស្រាប់តែលង់ទឹក ឃើញដូច្នេះឈ្មោះ ប៉ូច គីឡឹង ក៏បានចុះទៅជួយ ជាអកុសលក៏លង់ទឹកទាំងពីរនាក់លិចទៅបាត់មកទល់និងម៉ោងនេះ នៅមិនទាន់រកឃើញសិស្សសាលាប្រុសស្រីដែលលង់ទឹកនៅឡើយទេ។
លោកថា នៅក្នុងហេតុការណ៍នេះដែរ មានបងប្អូនប្រជាពលរដ្ឋនៅក្នុងភូមិ និងសមត្ថកិច្ចមូលដ្ឋាននៅស្រុកកូនមុំ ក៏បានចុះជួយអន្តរាគមន៍ស្វែងរកជនរងគ្រោះទាំងពីរនាក់នៅមិនទាន់រកឃើញ៕
