អន្តរជាតិ ៖ ប្រធានាធិបតីអាមេរិក លោក ដូណាល់ ត្រាំ បាននិយាយថា ការដឹកជញ្ជូនទំនិញតាមច្រកសមុទ្រ Hormuz នឹងត្រូវបានស្តារឡើងវិញយ៉ាងពេញលេញ បន្ទាប់ពីជម្លោះជាមួយអ៊ីរ៉ង់បានបញ្ចប់ ព្រោះទីក្រុងតេអេរ៉ង់ ក៏ត្រូវការនាំប្រេងចេញដែរ។
មេដឹកនាំអាមេរិករូបនេះ បានលើកឡើង ក្នុងអំឡុងពេលថ្លែងសុន្ទរកថាតាមទូរទស្សន៍ថា នៅពេលដែលជម្លោះនេះចប់ ច្រកសមុទ្រ Hormuz នឹងបើកឡើងវិញជាធម្មតា។
លោក ត្រាំ បានបន្ថែមថា អ៊ីរ៉ង់ ត្រូវការនាំប្រេងចេញ ដើម្បីសេដ្ឋកិច្ចទាំងមូល ហើយពួកគេនឹងឆ្លងកាត់ច្រក Hormuz ដូច្នេះច្រកនេះនឹងត្រូវបើកឡើងវិញ ហើយពេលនោះតម្លៃនឹងធ្លាក់ចុះយ៉ាងរហ័ស។
សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងធំៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ កងឆ្មាំបដិវត្តន៍អ៊ីស្លាម បានប្រកាសពីប្រតិបត្តិការសងសឹក ដោយកំណត់គោលដៅទីតាំងនានានៅក្នុងប្រទេសអ៊ីស្រាអែល។ មូលដ្ឋានយោធាអាមេរិកនៅបារ៉ែន ហ្ស៊កដានី គុយវ៉ែត កាតា អារ៉ាប៊ីសាអូឌីត និងអារ៉ាប់រួម ក៏ត្រូវបានវាយប្រហារផងដែរ៕
