អន្តរជាតិ ៖ សមាជិកយោធាទាំង៦រូប ក្នុងហេតុការណ៍ធ្លាក់យន្តហោះចាក់សាំងនៅភាគខាងលិចប្រទេសអ៊ីរ៉ាក់ ត្រូវបានបញ្ជាការកណ្តាលសហរដ្ឋអាមេរិក (Centcom) បញ្ជាក់ពីការស្លាប់ទាំងអស់។
របាយការណ៍ដំបូង មន្ត្រីសហរដ្ឋអាមេរិក អះអាងថា ខ្លួនបានរកឃើញយោធាចំនួន ៤ នាក់ដែលស្លាប់។ មន្ត្រី បានឱ្យដឹងថា ការធ្លាក់នេះ មិនបណ្ដាលមកពីការបាញ់ប្រហារណាមួយពីអ៊ីរ៉ង់នោះទេ។
យន្តហោះចាក់សាំងនេះ បានចូលរួមក្នុងប្រតិបត្តិការរបស់សហរដ្ឋអាមេរិកប្រឆាំងនឹងអ៊ីរ៉ង់ ក្រោយមកក៏បានជួបឧប្បត្តិហេតុជាមួយយន្តហោះមួយគ្រឿងទៀត ទើបបណ្ដាលឱ្យធ្លាក់ ប៉ុន្តែយន្តហោះទី ២ បានចុះចតដោយសុវត្ថិភាព។
យន្តហោះដែលផលិតដោយក្រុមហ៊ុន Boeing មានសមត្ថភាពចាក់សាំងនៅលើអាកាស និងដើរតួនាទីយ៉ាងសំខាន់ក្នុងប្រតិបត្តិការយោធារបស់សហរដ្ឋអាមេរិក។ ពួកវាត្រូវបានប្រើប្រាស់យ៉ាងទូលំទូលាយនៅក្នុងសង្គ្រាមឈូងសមុទ្រលើកទីមួយ ដើម្បីពង្រីកជួរយន្តហោះចម្បាំង និងយន្តហោះទម្លាក់គ្រាប់បែក៕
