(វៀងចន្ទន៍, ឡាវ)៖ នៅក្នុងកិច្ចប្រជុំគណៈកម្មការចម្រុះ ស្ដីពីកិច្ចសហប្រតិបត្តិការទ្វេភាគី (JCBC) លើកទី១៥ ដែលបានធ្វើឡើងក្នុងអំឡុងដំណើរទស្សនកិច្ចផ្លូវការរបស់ ឯកឧត្តមឧបនាយករដ្ឋមន្ត្រី ប្រាក់ សុខុន នៅសាធារណរដ្ឋប្រជាធិបតេយ្យប្រជាមានិតឡាវ ភាគីទាំងពីរបានសម្រេចនូវលទ្ធផលផ្លែផ្កាជាច្រើន ដោយផ្តោតសំខាន់លើការដោះស្រាយបញ្ហាព្រំដែន ការពង្រឹងវិស័យថាមពល និងកិច្ចសហប្រតិបត្តិការនយោបាយ។
ការប្តេជ្ញាចិត្តលើបញ្ហាព្រំដែន ចំណុចស្នូលនៃកិច្ចពិភាក្សាគឺបញ្ហាព្រំដែន ដោយភាគីទាំងពីរបានវាយតម្លៃខ្ពស់ចំពោះលទ្ធផលនៃការកំណត់ខ័ណ្ឌសីមា និងបោះបង្គោលព្រំដែនកន្លងមក។ កម្ពុជា និងឡាវ បានបង្ហាញឆន្ទៈនយោបាយដ៏មុតមាំក្នុងការជំរុញការដោះស្រាយបញ្ហាព្រំដែនដែលនៅសេសសល់ ដើម្បីប្រែក្លាយតំបន់ព្រំដែនឱ្យទៅជាតំបន់នៃសន្តិភាព មិត្តភាព ការអភិវឌ្ឍ និងកិច្ចសហប្រតិបត្តិការយូរអង្វែង។
ចំពោះកិច្ចសហប្រតិបត្តិការនយោបាយ និងការទូត រដ្ឋមន្ត្រីទាំងពីរបានសាទរចំពោះការផ្លាស់ប្តូរដំណើរទស្សនកិច្ចថ្នាក់ដឹកនាំកំពូលៗយ៉ាងសកម្ម រួមមានទស្សនកិច្ចរបស់ សម្ដេចមហាបវរធិបតី ហ៊ុន ម៉ាណែត នៅឡាវ (មីនា ២០២៤), ទស្សនកិច្ចរបស់ ឯកឧត្តម សនសៃ ស៊ីផាន់ដន នាយករដ្ឋមន្ត្រីឡាវ នៅកម្ពុជា (ធ្នូ ២០២៤) និងទស្សនកិច្ចរបស់ សម្តេចតេជោ ហ៊ុន សែន ប្រធានព្រឹទ្ធសភា នៅឡាវ (កុម្ភៈ ២០២៥)។ ភាគីទាំងពីរក៏បានឯកភាពបង្កើតយន្តការថ្មី ដើម្បីបង្កើនកិច្ចពិភាក្សារវាងក្រសួងការបរទេសនៃប្រទេសទាំងពីរឱ្យកាន់តែជិតស្និទ្ធ។
ចំណែកឯ សេដ្ឋកិច្ច ពាណិជ្ជកម្ម និងថាមពល លើវិស័យសេដ្ឋកិច្ច ភាគីទាំងពីរបានឯកភាពជំរុញទំនាក់ទំនងរវាងធុរកិច្ច និងធុរកិច្ច (B2B) និងបន្តអនុវត្តលទ្ធផលនៃកិច្ចប្រជុំគណៈកម្មាធិការពាណិជ្ជកម្មចម្រុះ (JTC) លើកទី២ ដែលបានធ្វើឡើងកាលពីខែមករា ឆ្នាំ២០២៥។ ជាពិសេស ឯកឧត្តម ប្រាក់ សុខុន បានថ្លែងអំណរគុណដល់ភាគីឡាវដែលបានផ្គត់ផ្គង់អគ្គិសនីមកកម្ពុជា ដោយភាគីទាំងពីរបានប្តេជ្ញាពង្រឹងកិច្ចសហប្រតិបត្តិការថាមពលឱ្យកាន់តែសកម្មថែមទៀត។
ការគាំទ្រគ្នាទៅវិញទៅមកលើឆាកអន្តរជាតិ ក្រៅពីកិច្ចសហប្រតិបត្តិការទ្វេភាគី ភាគីទាំងពីរបានផ្លាស់ប្តូរយោបល់លើបញ្ហាតំបន់ និងអន្តរជាតិ។ ក្នុងនោះ ភាគីឡាវ តាមរយៈឯកឧត្តមរដ្ឋមន្ត្រីការបរទេស ថងសាវណ្ណ ភុមវិហា បានប្រកាសគាំទ្រ និងជូនពរកម្ពុជាឱ្យទទួលបានជោគជ័យក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី លើកទី២០ នៅឆ្នាំ២០២៦ ខាងមុខ។
គួរបញ្ជាក់ថា កិច្ចប្រជុំ JCBC លើកទី១៥ បានបញ្ចប់ដោយការចុះហត្ថលេខាលើកំណត់ហេតុរួម ហើយភាគីទាំងពីរបានឯកភាពកំណត់យកឆ្នាំ២០២៧ ដើម្បីរៀបចំកិច្ចប្រជុំ JCBC លើកទី១៦ នៅព្រះរាជាណាចក្រកម្ពុជា៕ប្រភពអាកាប៉េ
