ខេត្តព្រះសីហនុ៖ នាថ្ងៃទី១៤ ខែសីហា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលក្រុងព្រះសីហនុ បានចុះអនុវត្តវិធានការរដ្ឋបាលចំហ លើទីតាំងផ្ទះល្វែងចំនួន ១០ទីតាំង ស្ថិតនៅក្នុងភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ។
ប្រតិបត្តិការនេះ ធ្វើឡើងក្រោមការណែនាំពី ឯកឧត្តម អភិបាលនៃគណៈអភិបាលខេត្តព្រះសីហនុ និងមានការសម្របសម្រួលនីតិវិធីផ្ទាល់ ពីតំណាងអយ្យការអមសាលាដំបូងខេត្តព្រះសីហនុ។
ជាលទ្ធផល កម្លាំងជំនាញបានរកឃើញឧបករណ៍អេឡិចត្រូនិចមួយចំនួន ដែលពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (Online Scams) ព្រមទាំងបានប្រមូលវត្ថុតាង និងឃាត់ខ្លួនមនុស្សមួយចំនួនដូចខាងក្រោម ៖
វត្ថុតាងដែលដកហូតបាន៖
កុំព្យូទ័រយួរដៃ (Laptop)៖ ចំនួន ៣០ គ្រឿង
ទូរស័ព្ទដៃ៖ ចំនួន ៨៥ គ្រឿង
មនុស្សដែលត្រូវបានឃាត់ខ្លួន៖
ឃាត់ខ្លួនជនជាតិចិនសរុប ២៥ នាក់ (ស្រី ២ នាក់)
-១៤ នាក់ (ស្រី ២ នាក់) ជាប់ពាក់ព័ន្ធដោយផ្ទាល់នឹងបទល្មើសឆបោកតាមប្រព័ន្ធបច្ចេកវិទ្យា
-១១ នាក់ ស្នាក់នៅដោយគ្មានលិខិតឆ្លងដែន និងឯកសារច្បាប់ត្រឹមត្រូវ
បច្ចុប្បន្ន ជនសង្ស័យទាំង ២៥ នាក់ រួមជាមួយវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីសាកសួរ និងកសាងសំណុំរឿងបញ្ជូនទៅសាលាដំបូងខេត្ត ចាត់ការតាមផ្លូវច្បាប់៕
