ព័ត៌មានអន្តរជាតិ : ការវាយប្រហាររបស់អ៊ីរ៉ង់លើទឹកដីប្រទេសអារ៉ាប់ និងការបិទច្រក Hormuz ជាថ្មី គឺធ្វើឱ្យខូចខាតដល់ទំនុកចិត្ត និងបិទឱកាសសម្រាប់ការដោះស្រាយការទូតនៅក្នុងរដ្ឋឈូងសមុទ្រ។នេះបើយោងតាមសេចក្តីថ្លែងការណ៍មួយដែលចេញផ្សាយបន្ទាប់ពីកិច្ចប្រជុំក្រុមប្រឹក្សារដ្ឋមន្ត្រីនៃក្រុមប្រឹក្សាសហប្រតិបត្តិការឈូងសមុទ្រ (GCC) នៅទីក្រុងម៉ាណាម៉ា ។
សេចក្ដីថ្លែងការណ៍នេះ មានខ្លឹមសារថា ទង្វើអរិភាពទាំងនេះរបស់អ៊ីរ៉ង់ មិនបម្រើដល់ការផ្សះផ្សាគ្នាទេ ប៉ុន្តែផ្ទុយទៅវិញធ្វើឱ្យប្រជាជន និងទំនាក់ទំនងរវាងប្រទេស និងប្រទេសកាន់តែឃ្លាតឆ្ងាយពីគ្នាទៅវិញទៅមក, ធ្វើឱ្យខូចដល់មូលដ្ឋានគ្រឹះនៃទំនុកចិត្ត, សាបព្រួសភាពមិនចុះសម្រុងគ្នា និងបិទទ្វារនៃការសន្ទនាដែលរដ្ឋ GCC តែងតែអំពាវនាវ។ ការឈ្លានពានមិនបង្កើតទំនាក់ទំនងទេ ហើយការគំរាមកំហែងក៏មិនបង្កើតស្ថិរភាពដែរ។
ពេញមួយយប់ កាលពីថ្ងៃពុធ សហរដ្ឋអាមេរិក បានធ្វើការវាយប្រហារលើទឹកដីអ៊ីរ៉ង់ ដើម្បីឆ្លើយតបទៅនឹងការបាញ់ទម្លាក់ឧទ្ធម្ភាគចក្រយោធា។ ទីក្រុងតេអេរ៉ង់វិញ បានវាយប្រហារមូលដ្ឋានទ័ពអាមេរិកនៅប្រទេសបារ៉ែន ហ្ស៊កដានី និងគុយវ៉ែត។ ក្រោយមកលោកប្រធានាធិបតីអាមេរិក ដូណាល់ ត្រាំ បានព្រមានអំពីការវាយប្រហារបន្ថែមទៀតប្រឆាំងនឹងហេដ្ឋារចនាសម្ព័ន្ធអ៊ីរ៉ង់ រួមទាំងស្ពាន និងរោងចក្រថាមពល។
ដោយឡែក ប៉ុន្មានម៉ោងមុននេះ អ៊ីរ៉ង់ បានប្រកាសពីការបិទច្រក Hormuz ឡើងវិញ បន្ទាប់ពីរងការវាយប្រហារថ្មីពីសហរដ្ឋអាមេរិក៕
