ខេត្តរតនគិរី ៖ ករណីគ្រោះធម្មជាតិដ៏រន្ធត់មួយបានកើតឡើង ដោយសារបាតុភូតរន្ទះបាញ់បណ្តាលឱ្យសត្វគោរបស់ប្រជាកសិករចំនួន ១៩ក្បាល បានងាប់ភ្លាមៗ នៅចំណុចស្រុកលំផាត់ ខេត្តរតនគិរី កាលពីរសៀលថ្ងៃម្សិលមិញនេះ។
បើតាមរបាយការណ៍របស់រដ្ឋបាលឃុំជ័យឧត្ដម ស្រុកលំផាត់ បានបង្ហាញថា ករណីរន្ទះបាញ់សត្វគោខាងលើនេះ បានកើតឡើងនៅថ្ងៃទី២៨ ខែឧសភា ឆ្នាំ២០២៦ វេលាម៉ោង ១:២០នាទីរសៀល។ គ្រោះថ្នាក់នេះបានបណ្តាលឱ្យសត្វគោរបស់ប្រជាពលរដ្ឋងាប់បាត់បង់អស់ ១៩ក្បាល ក្នុងនោះរួមមាន៖
ភូមិថ្មី៖ ងាប់ចំនួន ០៩ក្បាល
ភូមិស្រែឈូក៖ ងាប់ចំនួន ១០ក្បាល
យោងតាមការពន្យល់ផ្នែកវិទ្យាសាស្ត្រ រន្ទះបាញ់គឺជាបាតុភូតធម្មជាតិដែលកើតឡើងដោយសារភាពខុសគ្នានៃបន្ទុកអគ្គិសនីរវាងពពក និងផ្ទៃដី។ ក្នុងនោះ សត្វពាហនៈដូចជាគោក្របី ដែលស្ថិតនៅទីវាល ឬជ្រកក្រោមដើមឈើ គឺជាចំណុចស្រូប ឬជាចំណុចប្រសព្វនៃប៉ូលអគ្គិសនី ដែលងាយរងគ្រោះបំផុត។
ករណីគ្រោះថ្នាក់ដែលបណ្តាលឱ្យសត្វគោរហូតដល់ ១៩ក្បាលងាប់បាត់បង់ជីវិតក្នុងពេលតែមួយនេះ គឺជាការខាតបង់ទ្រព្យសម្បត្តិ និងប្រភពចំណូលយ៉ាងធំធេងសម្រាប់គ្រួសារប្រជាកសិករ។
អាស្រ័យហេតុនេះ សូមបងប្អូនប្រជាកសិករទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ នៅដើមរដូវវស្សានេះ ព្រោះជារឿយៗតែងតែមានភ្លៀងធ្លាក់លាយឡំជាមួយបាតុភូត ផ្គរ រន្ទះ និងខ្យល់កន្ត្រាក់ ដែលអាចបង្កគ្រោះថ្នាក់ជាយថាហេតុដល់ជីវិតមនុស្ស និងសត្វពាហនៈ៕
