អន្តរជាតិ ៖ កាសែត The Wall Street Journal (WSJ) បានរាយការណ៍ដោយដកស្រង់ប្រភពថា កិច្ចចរចាជុំថ្មីមួយរវាងទីក្រុងវ៉ាស៊ីនតោន និងទីក្រុងតេអេរ៉ង់ អាចនឹងធ្វើឡើងនៅទីក្រុងអ៊ីស្លាម៉ាបាដ នាសប្តាហ៍ក្រោយ។
យោងតាមរបាយការណ៍ បានឱ្យដឹងថា សហរដ្ឋអាមេរិក និងអ៊ីរ៉ង់កំពុងធ្វើការជាមួយអ្នកសម្របសម្រួលដើម្បីព្រាងអនុស្សរណៈនៃការយោគយល់គ្នា ដែលនឹងគូសបញ្ជាក់ពីលក្ខខណ្ឌនៃការចរចារយៈពេលមួយខែ ដើម្បីបញ្ចប់សង្គ្រាម។
របាយការណ៍ដដែល បានកត់សម្គាល់ថា កិច្ចចរចាអាចបន្តនៅអ៊ីស្លាម៉ាបាដ នាដើមសប្តាហ៍ក្រោយនេះ។
កាលពីថ្ងៃសុក្រ ប៉ុស្តិ៍ទូរទស្សន៍ Al Arabiya របស់អារ៉ាប៊ីសាអូឌីត ក៏បានរាយការណ៍ ដោយដកស្រង់ប្រភពការទូតមួយថា អ្នកចូលរួមក្នុងកិច្ចពិគ្រោះយោបល់ ដែលកំពុងត្រូវបានសម្របសម្រួលដោយប៉ាគីស្ថាន គឺផ្តោតលើអនុស្សរណៈនៃការយោគយល់គ្នា ដើម្បីបញ្ចប់សង្គ្រាម បើកច្រកសមុទ្រ Hormuz និងបន្ធូរបន្ថយការបិទផ្លូវអ៊ីរ៉ង់ពីសំណាក់អាមេរិក។
ដោយឡែក ប្រភពពី Al Arabiya បានសង្កត់ធ្ងន់ថា ដំណើរការចរចាគឺពិបាក ដោយមានឧបសគ្គនៅសល់ និងសកម្មភាពយោធាមួយចំនូន៕
