ខេត្តបន្ទាយមានជ័យ ៖ នារសៀលថ្ងៃទី១៦ ខែមករា ឆ្នាំ២០២៦ នៅជំរំសុវត្ថិភាពបឋមសិក្សាកណ្តោល ខេត្តបន្ទាយមានជ័យ លោកបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជននិងកីឡា បានដឹកនាំប្រតិភូក្រសួងនិងសប្បុរសជន ចូលរួមពិនិត្យសកម្មភាពរៀន និងបង្រៀននៅជំរំសុវត្ថិភាព។
លោកអ៊ុ រាត្រី អភិបាលខេត្ត លោកប្លែក វ៉ារី.ប្រធានក្រុមប្រឹក្សាខេត្តនិងមន្ត្រីបានអញ្ជើញទទួលប្រតិភូ។
ក្នុងឱកាសនេះដែរ លោកក៏បាននាំយកសម្ភារៈសិក្សា គ្រឿងឧបភោគបរិភោគ និងសម្ភារៈប្រើប្រាស់ចាំបាច់មួយចំនួន ប្រគល់ជូនសិស្សានុសិស្សភៀសសឹក ព្រមទាំងផ្ដល់ថវិកាលើកទឹកចិត្តដល់លោកគ្រូ អ្នកគ្រូ និងលោកឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ ដើម្បីគាំទ្រដល់ដំណើរការ របស់ជំរំសុវត្ថិភាពនេះបន្តទៀត សំដៅធានាបានថាសិស្សានុសិស្សភៀសសឹកនៅតែបន្ត ទទួលបានឱកាសសិក្សារៀនសូត្រ ប្រកបដោយគុណភាព និងសមធម៌ ទោះក្នុងកាលៈទេសៈណាក៏ដោយ។
ក្នុងឱកាសនេះ លោកបណ្ឌិតសភាចារ្យសូមកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកគ្រូ អ្នកគ្រូ និងមន្ទីរអប់រំ យុវជន និងកីឡា ដែលបានតស៊ូជម្នះរាល់ឧបសគ្គ ដើម្បីបន្តបេសកកម្មផ្តល់សេវាអប់រំដល់សិស្សានុសិស្សនៅតាមតំបន់ព្រំដែន ទោះបីស្ថិតក្នុងស្ថានភាពលំបាកយ៉ាងណាក៏ដោយ។
ជាមួយគ្នានេះ សូមថ្លែងអំណរគុណយ៉ាងជ្រាលជ្រៅចំពោះស្មារតីសាមគ្គីភាពរបស់ក្រុមគ្រួសារអប់រំទាំងអស់ ដែលបានបង្ហាញឱ្យឃើញពីធ្លុងសាមគ្គីគ្នាយ៉ាងរឹងមាំក្នុងគ្រាដ៏លំបាកនេះ ។
ហើយក្រសួងនឹងនៅតែបន្ត ចុះជួយគាំទ្រដល់សាលារៀនដែលរងគ្រោះ និងលោកគ្រូ អ្នកគ្រូភៀសសឹកទាំងអស់ ដើម្បីជួយសម្រួលជីវភាពរបស់បុគ្គលិកអប់រំនៃខេត្តបន្ទាយមានជ័យ និងខេត្តដែលរងផលប៉ះពាល់នៅតាមបណ្តោយព្រំដែន៕
